Hemsereka verêne ya DTP û Hetkara Hemserekanê HDPyî Aysele Tugluk 2016 ra nata Zîndanê Kandira de tepişîyena û rewşa ci ya weşîye bena giranêr.

Dima ke cenazaya dadîya ci raşra hêrişê nîjadperestî amebî rewşa Aysele Tugluk xirab bibî. Rixmo ke Fakulteyê Tibî yê Kocaelî raporê 'Nêeşkena zîndan de bimana' dabi ci seba ke DEzgehê Tipê Edlî (ATK) eqsê ci raporêk da Aysele Tugluk vera nêdîyena.

Birayê Aysele Tugluk Alaattîn Tuglukî derheqê rewşa waya xo de ANFyî rê qisey kerd.

Alaattîn Tuglukî da zanayene ke bi taybetî mîyanê nê 4 mengan de rewşa Aysele bîya giranêr û vat: ''Nêweşîya ci sey nobede dewam kena. Aye zaf kitabî wendêne la hînî nêeşkena kitab zî biwana, bewna televîzyonî ra. Bi saetan mîyanê cilan de manena.  Hişê ci şino. Ge ge nêeşekna qisey bikera, cewab bida persan. Dostê ci, sîyasetmedarî, merdimê ma nênê vîrê ci. Hînî ma têna xatirê yewbînan persenê. 

Na nêweşîya ci hêrişê vera cenazaya dadîya ma ra dima giranêr bîye, no çi, waya mi de bi travma. Aye nêwaştêne nêweşîya ci biba rojdem coka erey nêweşîya ci ameye eşkerakerdene. Aysele çend reyî mi rê vat 'Welat de zaf meseleyî estê, pê nêweşîya mi merdiman meşxul mekerê.' ''

Tuglukî pare kerd ke Aysele çend hewteyî verî ameye berdene bi nêweşxaneyî û nika ê pabeyê raporê neweyî yê. Tuglukî vat: ''Ma wazenê waya mi wa tedawî biba. Wa bêra weşkerdene. Cayê aye zîndan nîyo. Seba ke verê nêweşîya waya mi bêra girewtene ganî cism û rengan bivîna. Nêbo nêweşîya ci hîna bena giranêr.''