Aktîvîstanê cinîyan ê welatanê cîyayan ra ANF reyde qisey kerd û bale ante girîngîya paştdayîşê kurdan û şarê Rojawanî ser.

Endama Meclîsê Macarîstanî Vîoleta Tomîc vat: Eke ma dişmenê xo yê hemparî nas nêkenê hayîya ma zî ci ra nêbena û ma do bi asanî bibê hedefê manîpulasyonan. Naye ra wexto ke qala çarenusê merdimîye û dinyaya yeno kerdene, ganî ma pîya têbigêrê. Ganî ma bi hawayêkê bêtirsî îdeolojîyanê averwazan reyde şorê, seba naye şer bikê û seba dejo ke merdimê bêguneyî ancenê tewirê xo bimojnê. Seba erjanê neweyan ganî ma rayîrêkê vurnayîşê komelkî û sîyasî awan bikê û hêvî bidê înan. Ganî ma bizanê ke ma pêro beşêkê na rêxistine yê. Naye ra ez vana 'yew dinya, yew têkoşîn'.

Cînzîa Arrûzza, nuştoxe û fîlozofa îtlayanije, akademîsyena New School for Social Research and Eugene Lang College ya li New Yorkî: Rojawan têna seba Rojhelatê Mîyanênî ney seba pêro dinya mîsalêko manadar o ke mojnena ke newe ra rêxistinkerdişê têkilîyanê ma yê komelkî bi hawayêkê demokratîkî yenê ca. Kurdî wextêk ra nata benê hedefê hedefê vatişê 'terorîzmî'yê dewleta tirkan ke bi hawayêkê zelalî heqaret ci rê yeno kerdene. Ganî ma paştî bidê Rojawanî û xîretê Erdoganî yê çinkerdişê roşnîya şorişgêre mehkum bikê.

Dr. Nîda Kîrmanî, Akademîsyena Zanîngehê Zanyarîyanê Îdarî yê Lahorî yê Pakistanî (LUMS): Ez paştî dana têkoşînê haştîye û edaletî yê şarê Rojawanî û PYDyî. Ez venga komelê mîyanneteweyî dana ke paştî bido Rojawan û dewleta tirke û rejîmê Tumpî mehkum bikê. Venga Pakîstanî dana ke çalakîyanê hukmatê tirkî mehkum biko û hînî paştî nêdo polîtîkayanê zorbazan ê Erdoganî.

Dr. Ewa Majewska, femînîste û aktîvîste, Varşova/Polonya: Wexto ke mi eşnawit hêzanê artêşa tirke hêrişê Sûrîye kerd ez pê deja. Ez qesqwet kena ke DYA û zaf welatanê bînan Ê Ewropa bi hawayêkê nimitkî no îşxal qebul kerd. Ganî no şer û zulmê vera kurdan bêro qedînayene.