Qezaya Kanîreşî ya Çewlîgî de çawişê pisporî yê bi nameyê Ferhat K.yî cinîya bi nameyê R.O.ya ke semedo ke çawiş kewt peyê domanê ci nêrazîbîyayîşê xo mojna derb kerde û ci rê gefî wendî.

Vera nê hêrişî sere de cinîyê HPDyî û Komîsyonê Cinîyan ê Baroyê Çewlîgî xeylêk hetan ra paştî dîyaye R.O. û vengê nêrazîbayîşan zêdîyayî.

Baroyê Çewlîgî R. O. zîyaret kerde

Baroyê Çewlîgî ra heyetêkê avûkatan R. O. keyeyê ci de zîyaret kerd. Avûkatan vekaletname û evrakê R. O. girewtî û muracatê dozgerîye kerde.

Başarane: Îqtîdar û selahîyetdarî berpirsîyar ê

Vervatoxa Meclîsê Cinîyan ê HDPyî Ayşe Acar Başaran R.O. dir telefon de qisey kerd û dima ra hesabê xo yê medayaya sanalî de wina pare kerd: ''R. O. ard ziwan ke no şîdet şexsê aye de heme cinîyan rê bîyo û ma ra hetkarîye waşte. Ma sey Meclîsê Cinîyan ê HDPyî do na dewa teqîp bikerê û seba ke netîceyêka adîle bêro destfînayene çîyo ke destê ma ra bêro ma do bikerê. Xora ma zanê bitaybetî sûcê ke hetê hêzanê dewlete ra bajaranê kurdan de yenê kerdene pê kesêkî xoser nîyê. Ma timûtim vanê, êyê ke hêirşê Pêkerdişê Îstanbulî  û destkewteyanê cinîyan kenê hendê hêrişkarî sûcdar ê. Îqtîdar û selahîyetdarî şîdet û qirkerdişê vera cinîyan ra berpirsîyar ê.''

Aydemîrî babete kirişte rojdemê meclîsî

Wekîlê HDPyî yê Çewlîgî Erdal Aydemîrî zî serebûtê şîdetî kirişte rojdemê meclîsî û derheqê babete de vernîyazêk da Wezîrê Karanê Zereyî Suleyman Soyluyî.

Aydemîr wina persa:

Şexsê ke hêrişê Rahîme O. kerd kam o û wezîfeyê ci çîyo?

Hezê dewlete talîmatê şîdetî çara genê?

Şexso ke qala ci yena kerdene do karî ra bêro girewtene?

Medyaya sanale de çalakîye

Hetê bînî ra bîn şewe medyaya sanale de bi etîketê #İşkenceciUzmanÇavuş (çawişo pîsporo îşkenceker) çalakîye ameye kerdene. Sere de cinîyê HDPyî xeylêk kesî tewrê çalakîye bîyî û bi mesajanê xo waşt ke wa çawişo hêrişkar bêro muhakemekerdene.