Çalakîya grevê vêşanîye ya ke serkêşîya Leyla Guvene de ameye destpêkerdene, çend şino vila bena. Hetê bînî ra semedê paştîdayîşê girevanê vêşanîye çalakî zî dewam kenî. Mayanê Aşitîyê yê Stenbolî zî veng da ke wa vera tecdîrî bêvêng mêro vindertene.

Mayan ra Bedîa Gokyuze xoverdayîşê vera zulmî bimbarek hesibna û va: ‘‘Her çî de hevêr zerrîya ma mayan vêşena. Ça beno wa bibo ma her ca de vera zulmî yê. Ma nêwazenê zîndanan ra cenazeyî bivejî.  Dinya qey wina bîya bêwijdan, bêveng a? Ma heme binê zulmî de yê. Eke tecrîdê serê Birêz Ocalanî wedarîyo, tecrîdê serê Tirkîya zî yeno wedartene. Coka ganî ma bêveng memanê vera zulmî vengê xo berz bikerê.‘‘

Guler Bugdaye zî grevê vêşanîye yê vera tecrîdî yê verênî vist vîrî û best pa: ‘‘Ma nê dejî zaf hole zanê. Bi serran o no şer dewam keno. Heta ke tecrîd mêro wedartene qet yew mesele nêna halkerdene. Ma çend vanê aşitîye, edalet û seypêyîye, hukmatê Erdoganî polîtîkaya şerî dano domnayene. Senî zerrîya ma  mayanê Kurdan vêşena, a mayanê polîs û eskeran zî vêşena. Dejê ma yew o la ê bêvêng ê. Semedê vernîgirewtişê mergan ganî her kes vengê xo berz bikero.‘‘

Sebîha Bozane zî bale ante muhîmîya grevanê vêşanîye ser, bêvêngîya CPT û Mehkemaya Heqanê Merdiman a Ewropa şermezar kerde û vat ke ewro tena Kurdan rê nê her kesî rê faşîzm yeno bicaardene. Na dewlete her çî, her kesî çîn kena. Roje roja yewbîyayîşî ya.

Sîman Perî Akyildize zî waşt ke her kes grevanê vêşanîye rê wayîr bivejîyo û va: ‘‘Wa na dewlete hole bizano ke şarê Kurdî semedê Birêz Ocalanî heta peynî do mucadele bikero. Wa hewrê sîyayî hinî Îmrali ser a bêrî wedartene û Tirkîya bêro roştkerdene.‘‘

Fatma Çakire zî xoverdayîşê zîndanan ard vîrî û va: ‘‘Heta ke Birêz Ocalan azad mebo, ma zî azad nêbenî.  Ê se kenî wa bikerî nêeşkenî ma biqedînê. Dewlete ganî tewr peynî de hesabê kerdenanê xo bidê. Sîstemê AKP’yî û zîndanî nêeşkenê ma çîn bikerê. Ma estê, do bibê û bi xoverdayîş ser bikewê.‘‘