Wendekara Zanîngehê Munzurî Gulîstane Doku 113 rojan ra nata vînbîyaye ya. Xebata cigêrayîşî ya seba Gulîstane semedê vîrusê Korona ra kêmîyayî. Seba ke bale bêra antene na babete ser o twitter de tegê “VideoCozulsun GulistanBulunsun” (Wa vîdeo eşkera bibo Gulîstane bêra dîyene) ame akerdene. Bi seyan xebitnayoxanê medyaya komelkîye, kesanê namdaran û rêxistinanê cinîyan pê vilakerdişanê xo vera nêdîyayîşê Gulîstane Doku nêrazîbîyayîşê xo mojnayî.

Vilakerdişanê seba Gulîstane ra tayî wina yê:

Pawitişê Cinîyan: ''Vîdeoyê derheqê cayî de ke Gulîstane tewr peyêne tede dîyaye nêna eşkerakerdene. Çira îfadeyê vergumanê verênî Zainal Abarakovî nêgêrîyeno, o nêno hukmkerdene? Ma reyna û reyna persenê Gulîstane Doku kotî der a?''

Cadiyê Kampusî: ''Vîdeoyê derheqê Gulîstane de çira nêno eşkerakerdene? Çira îfadeyê Zainal Abarakovî nêno girewtene? Pawitişê sucadaran ra fek vera bidê. Heta ke Gulîstane bêra dîyene, ma do her roje hesab bipersê' Şima Gulîstane rê se kerd?''

Paşdayîşo Mor: '' Êyê ke tecwuzkeran, tacîzkeran pê zerrîweşîye vera danê çira cinîyan pey goş kenê? Ma reyna û reyna persenê Gulîstane Doku kotî der a?''

Cinîya Ciwane ya Azade: ''Gulîstane Doku 113 rojan ra nata vînbîyaye ya. Heta ke Gulîstane bêra dîyene ma do pê pêro hêzê xo têkoşînê xo dewam bikerê!''

Platformê Cinîyan ê Şahmaranî: ''Şima nêeşkenê pê mektuban û delîlanê zûrayînan, pê îdîayanê zûran na mesele mîyan bikerê. Wezîfeyê xo bikerê, vîdeo eşkera bikerê.''

Rêxistina Cinîyan a HDPyî: ''Êyê ke îstîsmarkerî vera dayî, 113 rojan ra nata seba Gulîstane gamêke nêerzenê, tehqîqatêkê bitesîrî nêkenê. Dêrsim de ke her cayê ci de kamerayêka mobese esta cayo ke Gulîstane vîn bîya de kamera çin a. Aya ke esta zî nêna eşkerakerdene!''

Komîsyonê Edaletê Sena Gulîstane Doku: '' ''Vîdeoyê derheqê Gulîstane de çira nêno eşkerakerdene? Çira îfadeyê Zainal Abarakovî nêno girewtene?''

Xelisîyayîşê Cinîyan: ''Şima çira xîrek kenê ke delîlan çin bikerê? Şima çira îdîayanê zûran, delîlanê zûrayînan virazenê? Şima kenê ke çita binimnê? Heta ke ma cewabê persanê xo bigêrê û Gulîstane bêra dîyene do fek tira nêverdê!''