Platformê Cinîyan ê Wanî Kuçeyê Hunerî de bi eşkerayîyêke bale ante qirkerdişanê cinîyan ser. 

Nameyê platformî ser o Temsîlkarê Weqfa Heqanê Merdiman a Wanî (TÎHV) Sevîme Çîçek qisey kerd û da zanayene ke 16 rojanê verênan ê gulane de 16 cinîyî ameyî qetilkerdene. Çîçeke vat: ''Sakîne Kultur hetê Serekê Ocaxanê Tîmanê Taybetan ê Şirnexî Îbrahîm Barkinî ra bi barbarî ame qetilkerdene û cenazaya ci ameye vêşnayene. Barkin 4 serrî bi hawayêkê sîstematîkî Kulture rê îşkence û tacîz kerd.''

Çîçeke îfade kerd ke peyê nê qirkerdişan de îdeolojîya pederşahî ya dewlete est a û vat: ''Kurdîstan de polîtîkayê şerê taybetî yê vera cinîyan ê kurdan û netîceya bêcezaverdayîşê sûcdaran de tacîz, tecawuz û qirkerdişî zêdîyenê.  Peyê nê kerdişan de camêrdê dewlete yê unîformakerdeyî est ê. Ganî ma vera şîdetê unîformakerdeyan vengê xo berz bikerê. Ma soz danê pêro cinîyan ke têkoşînê xo seba dinyayêka azad û têdûşte berz bikerê.''