Wan de serkêşîya Têgêrayîşê Cinîyan ê Azadan (TJA) û Meclîsê Cinîyan ê HDPyî de bi şîarê 'Wext wextê azadîya cinîyan o' Parka Musa Anterî de mîtîngê 8ê Adare Roja Cinîyan ê Kedkaran a Dinya ame kerdene. Cinîyan bi sloganana ''Cinî cuye azadîye'' kuçeyî zimnayî.

Verî hunermende Şîlane Dora konserêk da, dima Dilşahe Alkan û Aslihan Timur ê ke Baroyê Wanî de Nobeta Edaletî tepişenê vejîyayîşî sehneyî ser û derheqê rewşa zîndanan de qisey kerd. Aktîvîsta TJA Aynure Sarica zî bale ante balete têkoşînê cinîyan ser û vat: ''Şexsê birêz Ocalanî  de tecrdî heme zîndanan ra vila bi.  Ma nê têcrîdî qebul nêkenê. Camêrdî tim wazenê wa cinîyê pê dêsan de bimanê. Ma tîya ra veng danê; cinîyî do çirey verê destûrê polîtîkayanê şima medê.  Ma cinîyî vera polîtîkayanê şerî yê leyminan vejîyenê.'' Sarica ra dima mesajê Platformê Yewîya Cinîyan a Kurdan ameyî wendenê. Hunermende Rewşene Çelîker zî bi deyîranê xo reng da mîtîngî.

Hemsereka Pêroyî ya HDPyî Pervîne Buldan zî bi hezaran cinîyî kurdkî selam kerdî û nê vatî: ''Ewro roja vervejîyayîşanê ma  ya. Ma vera heme zextan û nêheqîyan vengê xo berz kenê. Kedkarê ke nêeşkayî ewro bêrê tîya û cinîyê ke zîndanan de sey rehînan yenê tepiştenê ez înan selam kena. Mayanê Haştîye, Emîne Şenyaşa, dayîka Gulîstane Doku û dayîkê ke tim meydanan de yê ez înan rê selamanê xo şawena.  Na no 8ê Adare dîyarîyê Denîze Poyraz û Garîbe Gezer kerd. Ez wirdan zî bi hurmet yad kena û soz dana ke me do têkoşînê înan bidomnê.''

Buldane bale ante xoverdayîşê cinîyan ser û vat: '230 serrî verî cinîyan na roje xeyale nêkerdêne. La ma cinîyî têkoşîn kerd û xeylêk heqê xo fînayî dest. Ma bi mîlyonan cinîyî ameyî têhet têkoşîn kenê. No qîm nêkeno, hema rayîrê ma derg o.  Ma wazenê wa meseleya kurdî pê metodanê demokratîkan bêro çareserkerdene. Yew mesele esta û nameyê ci meseleya kurdî ya.  Reyna ganî heqê cinîyan bi qanûnî bêrê pawitene. Yew menga peyêne de nê welatî de 26 cinîyan cuya xo vînî kerde û kiştoxanê înan ceza nêgirewt. Hukm camêrdanê qetilkaran paweno. Zîndanan de binpaykerdişê heqan tim zêdîyenî. Tepişteyê nêweşî mergî rê ameyî caverdayene. Ma do paştî bidê merdimanê tepişteyan û rewşa tepişteyan nêzdî ra teqîp bikerê. Îtîfaqê cinîyan eşkeno nêwelatî bibedilno. Nê meydanî, na herre, no welat ê ma yê û rojêke do miheqeq reyna bikewê destê cinîyan û HDPyî. Xespkerdişê şaredarîyan nîno qebulkerdene. Dewir do bibedilîyo. Şima do şirê, ma cinî bêrê.''

Badê mîtîngî bi seyan ciwanan bi slogananê ''Biciwîyo Serek Apo'', ''Cinî cuye Azadîye'' û ''Ciwanî fedaîyê Rayber Apoyî yê'' hîrê beran ra dest pê rayraşîyîşî kerd. Rixmê barîkatê polîsan rayraşîyayîş heta Meydanê Beşyolî dewam kerd.