Parlamentera HDPyî ya Agirî Dîrayet Dîlan Taşdemîre 6 aşmê bînî qedexebîyayîşê pêvînayîşê avûkat û Rayberê Şarê Kurdî Abdullah Ocalanî ser o da zanayene ke no zî nîşan dano ke sîstemêko taybetin Îmrali de esto.

Taşdemîre babete ser o ANFyî rê qisey kerde û va ‘îqtîdaro ke verê cû bi mehneyanê ‘muxalefetê hewayî’, ‘keştîye xirabe’ pêvînayîşan asteng kerdêne, nika zî huqûqî bikar ano û wazeno kaosî xorî bikero.

BI TEMAMÎ KERDIŞÊ KÊFÎ YÎ

Taşdemîre va ‘çîyê ke sey mehne yenî nîşan dayene nîşan danî ke sîstemêko taybet Îmrali de esto’ û wina dewam kerde: “Îmrali de 20 serrî yo ke huqûqo mîyanên û teberên yeno pelçiqnayene. Îqtîdar goreyê menfîetanê xo polîtîkayanê Îmrali domneno. Tecrîd 3 serranê peyênan de xeylê xorî bîyo. Birêz Ocalan çi eşkeno avûkatanê xo reyde, çi eşkeno keye û çi zî sewbîna pêvînayîşan bikero. Îqtîdarî verê cû vatênê ‘keştîye xirabe ya’, ‘muxalefetê hewayî’ û pêvînayîşan qedexe kerdêne, labelê ewro huqûqî bikar ano.”

HÊRIŞÊ ÎRADEYA BI MÎLYONAN BENO

Taşdemîre va ‘çîyê ke bîyî sebebê cezaya dîsîplînî, nînî aşkere kerdene’ û wina dewam kerde: “Ma zaf etirîyenî. Birêz Ocalan 27ê Temmuze ra nata nêşêno bi avûkatanê xo reyde, reyna 2016 ra nata zî nêşêno keyeyê xo reyde pêvînayîşan bikero. O wext nika qala kamcîn cezaya dîsîplînî yena kerdene? Ganî raya pêroyî rê bêro îzeh kerdene. Îmrali de sîstemêko taybetin esto û bêvengîya CPT û sewbîna dezgehan zî na çarçewa de yo. Na cezaya dîsîplînî vera îradeya bi mîlyonana kesan de hêriş a.”

TECRÎD AVERŞÎYAYÎŞAN RA QERFÎYAYE NÎYO

Taşdemîre va ‘tecrîd averşîyayîşanê Rojawan û Rojhelatê Mîyanênî ra qerfîyaye nîyo’ û wina qedêna: “Mehneyo ke newe yeno nîşan dayene, nîşan dano ke konseptêko newe erzîyeno dewre. Wazenî tecrîdê Îmrali ser ro kaos û şerî xorî bikerî. Çimkî tezê Birêz Ocalanî seba Rojhelato Mîyanênî sey rayîrê hîrêyin yenî dîyayene. Cok ra tecrîd yeno domnayene. Ocalanî sey astengî vînenî. Ma baş zanî ke xoverdayîş û têkoşînê 20 serran yê Birêz Ocalanî seba başîya cinîye, hetgiranê demokrasî û şaranê Rojhelatê Mîyanênî yo. Kesê ke wazenî Tirkîya biba demokratîke, ganî heme vera rejîmê taybetî yê Îmrali de vengê xo berz bikerî. Ganî Birêz Ocalan demêko raver bireso azadîya xo.”