28ê tabaxe de Mehkemeya Şorişî ya Îslamî de roniştişê Endama Komelgehê Cinîyan ê Azadan ê Rojhelatê Kurdîstanî (KJAR) Werîşê Muradî bibi la roniştiş ame peyde eştene. Werîşe Mûradî verê roniştişî mektubêk nuşt û vat a do heta peynî peyê fîkranê xo de vindero.

Werîşe Muradî mektubê xo de vat a tebaxa 2023yî de gama ke Kirmanşahî ra şîyênî Sîne hetê hêzanê îstîxbarî ra ameye tepiştene û Merkezê Destbendkerdişî yê Sine de û koxuşê 209. ê Zîndanê Evîne de raştê îşkenceyî ameye. Werîşe Muradî ya ke 27ê kanûna 2023yî de sewqê yewna zîndanî bîye, ard ziwan ke zehmetîya ke cinîyî ancenê zaf hole zana û vat a tim cayê cinîyan ê xoverdayoxan de ya û seba ke mîyanê nê têkoşînî de ya sereberz a.

Werîşe Muradî mektubê xo de bale ante zorîyê ke cinîyî zîndan de ancenê ser û vat cinîyî vera zextan xover danê û nê zorîyê  înan hêzdar kenê. Werîşe Muradî îfade kerd ke cinîyê têkoşîno ke do tarîxî bibedilno rayra benê û vat: ''Ma qerardar ê ke na cuye bikerê azad. Ma qerardar ê ke na cuyeya zehmetin ra bi tacê azadîye bivejîyê.''

Werîşe Muradî îfade kerd ke rixmê qeraranê bi zextan ê mehkeme û zextanê îdareyê zîndanî cinîyî têkoşînê xo domnanê û vat: ''Cinîyî do rayîrê tarîxê nê welatî bewlî bikerî û felsefeya Jin, Jiyan, Azadî dinya de vila bikerê.''

Werîşe Muradî ard ziwan ke seba ke qerarê îdamî yê vera Pexşane Azizi û Şerife Muhammedî protesto bikero a tewrê roniştişê 4ê tebaxe nêbîya.

Werîşe Muradî ard ziwan ke roniştişê aye yeno manayê muhakemekerdişê heme cinîyan ke têkoşînê azadîye rayra benê û vat a do menga êlule de reyna vejîyo mehkeme û pawitişê felsefeya  'Jin Jiyan Azadî' rê dewam bikero. Werîşe Muradî vat se beno wa bibo têkoşînê azadîye yê cinîyan do ser bikewo.