Wextê bastêq û aqîtê ame: Baro giran reyna milê cinîyan de yo

Semsûr de sey her serre bi ameyîşê payîzî aqît û bastêq yeno viraştene. Cinîyê ke aredayîşê engure ra heta viraştişê aqît û bastêqî de pêroyê bar milê înan de yo, naye ra lome kenê.

Semsûr de aqîto ke her sifre de cayê xo geno, seba viraştişê ci lîye yî nîyayî ra. Aqît û bastêqê engure ke mintiqa de sey ‘kerge’ yeno zanayene, semedê viraştişê ci xebatî dest pêkerdî. Fîlîz Yucela ke mezraya Çemê Kahta de ronîşena, viraştişê aqîtî ser o qisey kerde.

‘HÊVER ENGURE YENA VÎJNAYENE’

Yucele arde ziwan ke gureyo tewr zehmet binê tîje de arêdayîşê engurî yo û wina va: "Ma hêver engure vîjnenê û kenê ciwalan. Gencî zî wextê pîtkerdiş û eciqnayîşê ciwalan de hetkarîya ma kenê. Dima ra awa ke vejîyena, ma girênenê, kenê aqît û bastêq.

‘MA ŞEFEQÎ RA HETA ŞEWE LINGAN SER O YÊ'

Fîlîz Yucele xebata xo bi nê vatişan arde ziwan: "Ma şefeqê sibayî ra heta şewe lingan ser o yê. Roje aqît vejenî û şan zî bastêqî arê dane. Arêdayîşê engure ke aşma êlule de dest pêkeno, vîjnayîş, pakkerdiş, girênayîş û wişkkerdiş pero pîya 4-5 rojî derg keno."

‘BARO GIRAN MILÊ CINÎYAN DE YO’

Yucele peynîya qiseykerdişê xo de wina va: "Xora ma karê keyeyî, miqatkerdişê heywanan û xeylê gureyanê bînan zî kenê. Bi qala kilme ma yew gure nê, bi desan gureyan kenê. Baro giran sey hertim milê ma cinîyan de yo. Neheqîye bêadaletî ra bena û bêadeletîye zî serdestîya camêrdan ra ya. Ganî ma cinîyî binena qerarin seba heqanê xo têbigerê û zihnîyeto cînsî binate ra wedarnê