Endama Koordînasyonê KJK’yî Dîcle Xabûre Strêk TV de programê Rojeva Jin’î rê qisey kerd û peyamê peyênî yê Rayberê Şarê Kurdî Abdullah Ocalanî û xoverdayîşê grevê vêşanîye yo ke qedîya ercnayî.

Xabûre ard ziwan ke xoverdayîşê grevê vêşanîye bi serkêşîya hemsereka KCD’yî ya cinî û maye Leyla Guvene dest pêkerdo, mîyanê cimatî de vila bîyo û vat, bi qehremananê nê xoverdayîşî dimayê 2011’î reya ewilêne Ocalanî avûkatê xo dîyê. Xabûre vat ke çalakîyê ke bi şexsan dest  pêkerdo bîyo cimatkî, rayîr akerdo ke faşîzmê AKP-MHP’yî pey ser game bierzo û vat çalakîya seba Ocalanî resaya amacê xo.

Tecrîd bi Temamî Nêqedîyayo

Xabûre da zanayene ke tecrîd bi temamî nêqedîyayo, bi qewimîyayîşanê ke Riha de ameyê ciwîyayene no ameyo dîyene û vat, “Ûca çîyê teberê merdimîye û îşkence hemverê merdiman de ame kerdene. Tirkîya de polîtîkayê înkar û îmhaye dewam kenê. Nê rojanê peyênan de hêrişê serê Wareyê Pawitişî yê Medya zî ramojnenê ke tecrîd bi temamî nêqedîyayo.”

Seba Kurdan Tim Berêko Newe

Xabûre ard ziwan ke dimayê 8 serran pêvînayîşê Rayberê Şarê Kurdî Abdullah Ocalanî seba Kurdan yeno manaya abîyayîşê berêkê neweyî û vat, “Peyamê ke ê di pêvînayîşanê peyênan de dayê ganî hetê demokrat, roşinvîr, muxalefet û hetê neteweyîyî ra bêrê munaqeşekerdene. Çunke peyamê çareserîya demokratîkkerdişê Tirkîya yê Rayber Apoyî, sere de Îran û Sûrîye hemeyê Rojakewtena Mîyanêne zî gêno xo zere. Peyamo ke dimayê 7 serran ra ame yê 2’ê Gulane zî seba çareserkerdişê krîzê Tirkîya yo.”

Rolê Mayan ê Mexmelsipîyan

Xabûre bale ante hemleya xoverdayîşî de rolê fonksîyonel û tarîxî yê mayanê xoverdayoxan ser û vat, “Cinîyan tim morê xo dayo tarîxî ro. Prosesêkê wina krîtîkî de mayê ma seke vilikanê sipîyan vejîyayî kuçeyan û serkêşîya prosesî kerde. Ma sey Têgêrayîşî Cinîyan heme mayanê xo pîroz kenê û silam kenê. Maya embaz Zulkuf Gezenî şîye serê gorê ê, mujdane daye ke çalakîya ke înan dabî destpêkerdene bi ser kewta, no têgêrayîşê aye ercêno ke kes pîroz bikero. Naye ra ma destanê mayanê xo maç kenê. Çalakîya Mayan ê Mexmelsipîyan bîye têgêrayîşêk. Sipîyo ke dinya de sembolê azadîye yo, bi serkêşîya mayanê ma ancî bîyo sembol.”