Tepişteye Remzîye Karadaga ke pîya bi hîrê embazanê xo çimeyê C-4î yê Zîndanê Qefilnayeyî yê Cinîyan ê Xapêtî de manena bi keyeyê xo da pêhesanyene ke ê raştê hêrişê 20 gardîyanan ameyî.

Goreyê zanayîşanê ke babîyê Karadage Salîh Karadagî dayî 12ê gulane de rixmo ke wextê hewagirewtişî hema de nêbîyo gardîyanan waşt ke nê 4 tepişteyê cinîyî şirê zere. Seba ke înan qebul nêkerdo 20 gardîyanan ê derb kerdî. Tepişteyê ke rîyê hêrişî ra bedênê înan bîyo sîya xême nêameyê berdene nêweşxane û rapor înan nêdîyayo. Babî Karadagî vat kênaya mi vato ke gardîyanî semedê hêrişkerdişî yenê perwerdekerdene û beno ke hêrişî zafêr bibê. Coka veng da Komeleya Heqanê Merdiman (ÎHD) û dezgehanê bînan û waşt ke wa her kes semedê înan hîsgêr tê bigêro.