Fermandarîya Yewinanê Cinîyan ê Şingalî (YJŞ) derheqê Fermanê 3yê Tebaxa 2014î de eşkerayîyêke daye. 

Eşkerayîye de ame parekerdene ke YJŞyî bingeyê fikr û felsefeya azadîya cinîyan a Rayberê Şarê Kurdî Abdullah Ocalanî de ronîyayo û 9 serrî yo bi pilbîyayîşî rayraşîyayîşê xo rê dewam keno. Fermandarîya YJŞyî da: ''Fedayîyanê Rayber Apoyî seba pawitişê êzidîyan bedelê pîlî dayî. Fedayîyanê ey erdê ma xelisna û teslîmê ma kerd. Rayber Apo nika binê tecrîdê dewleta tirke de yo. Ma bi şîarê 'Jin, Jiyan, Azadî' nê tecrîdî şermezar kenê. 

Êzidîyan bi Fermanê 3yê Tebaxe bedelê pîlî dayî. Dewleta tirke nê qirkerdişî de paştî daye DAÎŞî. DAÎŞî êzidîyî kerdî hedef, cinî û kênayî kerdî esîr, tacîz û tecawuzê înan kerd. Dewleta tirke DAÎŞ weye kerd. Şingal bi cewherê xopawitişî û xorêxistinkerdişî ame pawitene.  Dewletê Ewropa, dewleta tirke, hukmatê Iraqî û keyeyê Barzanîyan bi Peymana Şingalî ya 9ê Teşrîna Verêne armanc kenê ke êzidîyî reyna bêrê qirkerdene. La êzidîyî sey verî nîyê û wayîrê hêzanê xo yê YJŞ-YBŞyî yê. Ma sey YJŞyî wayîrê erdê xo vejîyenê, têkoşîn û xoverdayîşî kenê. Seba ney zî ma xoserîya xo awan kerde.

Ma sey YJŞyî Fermano 74. qetî xo vîr a nêkerd. Ma do bi caardişê azadîya Rayber Apoyî û xoserîya Şingalî qesasê nê fermanî bigêrê. Serra 9. ya Fermanî de cinîyî ganî bi şîarê 'Qesasê fermanan bi rêxistinî û pawitişê cinîyan mumkîn o' têbigêrê. Ganî şarê ma yo êzidî abigêro erdê xo; kultur, dîn û tarîxê xo bipawo.''