Fermandaranê Qeragehê Merkezî yê YJA-Starî ra Şerda Mazlum Gabar  derheqê têkoşînê azadîye yê cinîyan û xoverdayîşê YJA-Starî de ANFyî rê qisey kerd.

Gabare da zanayene ke 2021 de şerê vera dewleta tirke do bibo pîlêr û vat: ''Dewlete pê şîdet û çaresernêkerdişî înkar, îmha û tasfîye ferz kena. Hêzê vera sîstemî zî nêeşkenê xo rêxistin bikerê. Na rewşe hetê ma ra qebul nêbena. Eke çalakîya xoafernayîşê neteweyêke de cinîyî rolê aktîfî bigêrê xo ser hînî a netewe ser kewena. Raştîya kurdan de na rewşe vejîyaye werte.''

Gabare pare kerd ke têkoşînê azadîye yê cinîyan têkoşînê azadîye yê kurdan reyde aver şi û bi nê hawayî cinîyî komel de zêdêr asenê. Gabare Hemleya 'Wext wextê pawitişê cinî û komelî yo' viste vîrî û eşkera kerd ke hînî dinya de meseleyê cinîyan benê rojdem. Gabare vat: ''Meseleya azadîye ya cinîyan pêro hetanê îdeolojîk, huqûqî, sîyasî rêxistinî û kulturelan ra nêna ercnayene. Rayberîya ma pê paradîgmaya xo her hetî ra nêzdîya meseleya cinîyan bîye. Hayîya ma pê mesuldarîyanê ma esta. Ganî ma vera tecawuz û qirkerdişê cinîyan vengê xo berzêr bikerê, vera nê kerdişan ganî cinîyî wayîrê yewbînan vejîyê û rêxistina xo aver berê. Ganî ma qet yew cinîye qurbana nê sîstemî nêkerê û vera tedayan pîya têkoşîn bikerê. Ganî ma xo rêxistin bikerê û bi nê hawayî hîşmendîyêka hempare û tewirêkê hemparî awan bikerê.''

Fermandare Gabare ard ziwan ke ganî hînî têkoşînê azadîye yê cinîyan bikero ke cinîyan perwerde bikero, bipawo, rêxistin bikero û bivurno. Ganî rêxistinîya xopawitişî biba esasê ma. Bi taybetî ganî ma vera şîdetê serê cinîyan rêxistinîyanê winasênan her ca de ronê.''

Fermandare Şerda Mazlum Gabar peynîya qiseykerdişê xo de wina vat: ''Sey YJA-Starî têkoşînê azadîye yê cinîyan de ma wayîrê îdîa û tewirêkê xurtî yê. Ganî cinîyî şerê vera sîstemê serdestîya camêrdan de pê xo bawer bibê. Wa cinîyî bizanê ke YJA-Star qetî do înan têna nêverda.''