Fermandarîya Qererqahê Merkezê YJA Starî gerîlayêke war de yê înan rê mesajêk weşana. Mesaj de şehîdî ameyî ydakerdene, xoverdayîşê gerîlayan ame pîrozkerdene û nê ameyî vatene:

''Têkoşînê ma yo ke serkêşîya Rayber Apoyî de kewt serra pancasine semedê azadîya şarê kurdî û Rojhilatê Mîyanênî gamanê pêtan erzeno. Paradîgmaya Medenîyetê Demokratîkî çend şina vila bena. Nika xeyrê têkoşînê gerîlayan şansê şaran est o vera sîstemê camêrd-dewlete ser bikewê. Seba ke verê azadîya şaran bêro girewtene hêzanê komplokeran Rayberîya ma sey esîrî tepişt. Sîstemê Îmraliyî yo ke normanê merdimîye û huqûqî geno binê lingan  û hêrişê vera şar  û gerîlayanê ma, nê  heme semedê vergiretişê paradîgmaya Apoyîye yê.

Na çarçewe de heme hêrişê ke vera Rayber û gerîlayanê kurdan benê engişta hêzanê hegemonîkan tede est a. Sîstemê îşkenceyî yê Îmraliyî bena xorîyêr, vera şarê ma zextî çend şino zafêr benê û vera waranê gerîlayan çekê kîmyewî zî tehe her qeyde hêrişî yenê kerdene. La vera heme hêrişan bêvengîya mîyanneteweyîye est a. Çunke menfeatê înan nê hêrişî ra est o. Eslê xo de nê hêzî paştî danê rejîmê AKP-MHPyî yê helisîyayeyî ke vera têgêrayîşê ma de payra bimano. Wazanê ke paradîgmaya Rayberîye werte ra wedarê.

Hêzê ma yê mîlîtanî yê ke bi xoverdayîşê xo eşqê azadîye û ehlaqê seserra 21. vete meydan bi zanayîşê na raştîye wayîrê paradîgmaya Rayberîye vejîyenê. Coka cehpheyê azadîye pawenê û semedê pawitişê ercanê destkewteyan şerê pîlî kenê. Senî par xoverdayîşo pîl da emser zî Zap û Avaşîn de eynî xete de şertanê giranan de şer kenê. Gerîlayê ma anorê şarê kurdî, cinîyan û merdimîye temsîl kenê. Rejîmo faşîst semedê îmhakerdişê kurdan heme îmkananê xo şuxuleno û çîyo ke destê ci ra yeno keno. Vera naye hêzê ma yê azadîye xoverdayîşê xurtî danê. Coka no şero ke ma reyra benê şertanê şerê dinya yê hîrêyînî de semedê cinîyan û şaran şerê estbîyayîş-çînbîyayîşî yo.

Faşîzmê AKP-MHPyî vera ercanê kurdan, gerîlayê ke nê ercan pawenê û herra welatê ma hêrişanê xurtan keno. Her qeyde teknîk şuxulneno û her vinceyê herra me bombarduman keno. Rejîmo faşîsto ke vano qey pê nê hêrişan eşkeno ruhê azadîye çîn bikero Avaşîn û Zap de reyna raştê têkoşînê mîlîtanîya Apoyîye ame û û ratşîya hesabê xo ya xeletî dir ame têrî. Rejîmo faşîsto ke estbîyayîşê xo serê çînkerdişê kurdan de nayo ro pê hêrişê vera kurdan heme ercanê merdimîye hedef keno. Manaya hêrişî eşkera ya, coka kurdê ke paştî danê nê hêrişî îxanet kenê. PDK sey koleyê rejîmê faşîstî şarê xo rê xayînîye keno. Nika ma her wextî ra zafêr  azadîye rê nêzdî bîyî la hêzê xayînî kenê ke bi nameyê serdestan verê naye bîgêrê.

Roja 8. ya xoverdayîşî de tradîsyonê xoverdayîşê Zapî dewam keno ke tarîxê têkoşînê ma de dişmen tîya tim bin kewno. Mîlîtanê ma yê YJA Starî yê ke mîyanê nê têkoşînî de xeta Rayberîye de çalakîyan rê serkêşîye kenê, mîsyonê xo bi serkewtişî anê ca. Hemrayê ma yê ke bi eşqê azadîye yê pîlî û moralê pîlî binê bombayan de bi hewayêkê xurtî danê dişmenî ro û cinîya azade serpilik de temsîl kenê, ma înan bi qerardarîya serkewtişî selam kenê, pîroz kenê. Xoverdayîşê gerîlayan do dişmen û nasnameyê bêanor û xayînî rê bidê vînîkerdene. Nê koyî sere çewtnêkerdişê nasnameyê kurdî/a bianorî/e temsîl kenê. No welat û no şar azadîye heq kenê. Ma reyna embazanê xo yê şehîdan bi hurmet yad kenê û şexsê hêzanê ma yê Zap û Avaşînî de heme mîlîtananê HPG û YJA Starî biheskerdiş selam kenê. Xeta Rayberîye do ser bikewo û sîstemê dewleta serdest-camêrdî û hemkarê ci do bin bikewê.''