Fermandarîya Qerargehê Merkezê Pawitişê Şarî (MPŞ) cîhazê bêtelî ra gerîlayan rê mesajêk wend. Mesaj de bale ameye ser antene ke prosesêkê tarîxî ra yeno ravêrtene û ame vatene eke dişmen Zap de bin bikewo do Anqara de zî bin bikewo.

Mesajê fermandarîye wina ya:

''Hetê têkoşînê azadîye ra ma prosesêkê muhîm tarîxî ra ravêrenê. Dişmenî 17 nîsane de vera eyalatanê Zap û Avaşînî hêriş da destpêkerdene. Xoverdayîşo ke vera hêrişî yeno dayene ma selam kenê. Di rojanê verênan de embazî zaf serkewte bî. Embazê ke bi ruhê fedayîyî yê Apoyî xover danê, şer kenê, têkoşînê înan zaf muhîm o. Coka heme embaz bitaybetî embazê ke nê têkoşînî de ca genê ma înan pîroz kenê, selam kenê û dewamê têkoşînê înan de serkewtiş wazenê.  Netîceya wird rojanê verênan zaf muhîm a. Seke yeno zanayene her pêkewtişî de rojê verênî, gamê verênî zaf muhîm ê. Çunke gorayê gamanê verênan gamê bînî yenê eştene. Ma di rojî xo dîma verdayî, kewtî roja hîrêne; embazê serkewte yê. No serkewtiş eşkeno bibo bingeyê serkewtişê pîlî. Coka ma nê hîrê rojan zaf muhîm hesibnenê. Xoverdayîşo ke na çarçewe de yeno kerdene beno ke rayîrê serkewtişanê pîlan abikero.

No têkoşînêko bimbarek o

Şero ke Zap de yeno kerdene semedê artêşa tirke ya îşxlaker zaf muhîm o. La semedê Rayberîye, têgêrayîş û şarê ma heta semedê heme şarê herême zî zaf muhîm o. Qey? Dewleta tikre 2016î ra nata bi konseptêkê newî têgêrena. Armancê nê konseptî no yo; seba ke verê têkoşînê azadîye yê Kurdîstanî bigêro qerarê pîlkerdişê Tirkîya girewto. Wazenê Iraq û Sûrîye zî bigêrê binê kontrolê xo. Pê xeyalê  Osmanîyî  wazenê herême de bidê hêzo pîl. Coka no senî ke semedê şarê ma tehluke yo, semedê ereban û heme şaranê herême zî tehluke yo. tekoşînê vera nê konseptî bimbarek o, zaf muhîm o. Semedê wedartişê tehlukeyê serê herême, semedê wedaritişê sîyasetê qirkerdişî yê vera kurdan, semedê akerdişê  rayîrê estbîyayîş û azadîye no têkoşîno ke yeno kerdene tarîxî, bimbarek o. Rayîrê azadkerdişê Kurdîstan û Rayber Apoyî zî nê têkoşînî ra ravêreno.

Kenê ke qesas bigêrê

Seke yeno zanayene dewleta  tirke şero ke çarçeweya nê konseptî de domenena de heta nika ser nêkewt. Bitaybetî 2021 de vera Başûrê Kurdîstanî hêrişê îşxalî da destpêkerdene. Bi nê waştişî nişka hêrişê Garê kerd. Ûca şikîyaye. Dima ra hêrişê Avaşîn, Zap û Metîna kerd. Waştişê 3 aşman de heta  Qendîlî bêro û heme Başûrê Kurdîstanî û Herêmanê Pawitişî yê Medya îşxal bikero. La têkoşîno ke serkêşîya fermandaranê ma yê fedayîyan Şoreş, Serhad, Sarya, Rêber, Hêza, Botan, Zinarîn, Cumalî û Çavrê de ame dayene de verê dişmenî girewt, dişmen bîn fîna. Dişmen 2021 de eşkera bin kewt. Dewleta tirke ya ke nê binkewtişî nêeşkena qebul bikero, pê heme hêzê xo kena ke qesasê ci bigêro.

Beno ke hêrişê Metîna zî bikerê

Hetê bînî ra îqtîdarê AKP-MHPyî seba ke nê konseptî biresno serkewtişî wezîfe girewt. Eke ser mekewê do rejîmê înan bêro rijnayene, ê do bikewê zîndan. Çunke xoverdayîşê 2021 ê rijnayîşî rê rî bi rî verdayî. Coka ê bi heme îmkananê dewlete şansê xo reyna ceribnenê. Coka hêrişê vera Avaşîn û Zapî dîya destpêkerdene. No hema destpêkerdiş o. Hêriş dahîna hîra û derg o. Ganî ma nê bizanê.  Beno ke mîyanê çend rojan de hêrişê waranê bînan zî bikerê.  Eke nê cayan de ser bikewê sey parî semedê îşxalkerdişê Herêmanê Pawitişî yê Medya konseptî kenê hîra.

Eke Zap de bin bikewê Anqara de zî do bin bikewê

Ê do Mexmûr, Şingal û dima ra Rojawan bikerî hedef. Waştişê dewleta tirke ya îşxalker no yo. Sey hetanê hêzdaran hetê dişmenî yê zehîfî zî est ê.  Heto hêzdar teknîk û îstîxbarat ê. Teberê nê de dişmen her hetî ra zehîf o û ma eşkenê nê dişmenî bin bifînê.  Raşta dişmen nika bi teknîkê dewrî hêrişê ma keno û vera nê têkoşîn zî rehet nîyo la ma eşkenê nê hêrişî semedê xo bikerê wesîleya hemle. Eke ma dişmenî bin bifînê dişmen têna Zap de nê eynî wextî de do Anqara de bin bikewo, sîstemo qirkerdox do bêro rijnayene. No têkoşîn semedê azadîye şar û Rayberîya ma yo. Semedê demokrasîya şarê herême zaf muhîm o. Coka semedê serkewtişê nê têkoşînê bimbarekî ganî destê ma ra çi yeno ma bikerê.

Zap mekanê têkoşînanê pîlan o

Zap mekanê têkoşînanê pîlan ê tarîxîyan o. Xora amadekarîya embazan zî est a. Yeno zanayene 2018 de zî dişmenî waşt Zapî îşxal bikero la o  wext zî bin kewt. Têkoşînê HPGyî ser kewt.  O wextî ra nata Zap de zaf pêkewtiş û têkoşînî ameyî ciwîyayene.  Fermendar û hemrayê sey Reşit Serdar, Azad Sîser, Çiçek Kiçî, Mehmet Goyî û Ali Pilingî tîya bingeyê têkoşînî aferna.  Tewr peynî de hemrayan Bawer û Melsa bingehê têkoşînî ard ra. Xora Avaşîn zî waro winayên o. Ma zanê tîya têkoşîn rehet nîyo. La pê ruhê afernayoxî yê Apoyî û fedakarîye û cesaretî ma eşkenê ser bikewê.

No şerê qehremanan o

No şerê mîlîtanan o, şerê fedayîyayn o, şerê qehremanan o, şerê gerîlayanê profesyonelan o. bi qala kilme şerê qehremanan o. Tarîxê ma de yeno vînayene ke her yew qehreman sey taburêkî şer kerd. Şerê ma yê ewro zî eynî wina yo. Her yew embazê/a ma qeheremanê dewrî yo/a. Embazî ganî ercê xo û embazanê xo hole bizanê. Senî ke ma têkoşînê Girê Sorî de dî çimeyo tewr pîl ê hêzî ruhê embazîya Apoyî ya. Embazî ganî her hela cuye û têkoşînî nê bipawê. Ruhê hemrayîye û tewirê ekîbî, yewbînî rê heskerdiş û hurmet hetkarî û parekerdişî keno xorî. Her embaz şerî hewceyê nê yo.

Tunelê ma qelayê ma yê

Tunelî şerê dewrî de tewirêkê zaf muhîm ê. Tunlê ma qelayê ma yê. 200 serrî cuwa ver kelayî mewzîyê tewr muhîm ê şerî bî. Ewro tunelî nê rolî kay kenê.  Ma no heqîqet 2021 de dî. Eke şerê tunelan bi rayîr û metodanê raştan bêro rayraberdene û şerê tîmanê pîsporan arazî de bêro dayene vera dişmenî serkewtiş qetî yo. Hetê bînî ra qet cayêkê dinya de şer bi têkoşînê pasîfî ser nêkewt. Şero ke bingeyê pawitişê aktîfî de yeno rayraberdene ser kewno. Pawitişê ma ganî tim aktîf bo.  Pawitişo aktîf yeno manya hêrişî.  Ganî tim dişmenî rê hêriş bêro kerdene. Ruhê şerî yê dişmenî çîn o. Teknîkê ci est o. Ti ganî xo vera teknîkî bipawê û gama ke firsat dî darba pîlê  bidê piro. Warê bînî zî eşkenê çalakîyan bikerê. Senî ke ma vat ganî şarê ma zî bêveng memano û rolê xo kay bikero.

Kam ke hêrişê gerîlayan bikero do cewabê xo bîgêro

PDKyî par zî hemkarîya dişmenî kerd.  Hemkarîya ci kerde. No senî kerd? Dormeyê gerîlayan girewt, ambargo na ro. Hetê bînî ra îstîxbarat pare kerd, rêxistinanê îstîxbaratî reyde gureya.  Reyna gerîlayan rê xap kerd, damî nayî ro. Xelîfan de hêriş kerd gerîlayî şehîd kewtî. La senî ke eseno emser hemkarîya xo aver berda. Coka ma vanê ganî şarê ma vera nê vejîyo û berpirsîyarîya xo bîyaro ca. Dişmen keno ke şerê mabênê kurdan vejo û PDK zî paştî dano ci. Siba se beno bewlî nîyo. Ganî her kes wayîrê berpirsîyarîya xo vejîyo. Ganî embazî hîşyar bê û heme tedbîranê xo bîgêrê. Ma nêwezanê mabênê kurdan de şer vejîyo la eke bêrê ma ser ganî embazî cewabo ke hewce keno bidê înan.  Xopawitiş heqêko bimbarek o. Kam ke hêrişê gerîlayan bikero do cewabê xo bîgêro. Ma semedê tewirê neteweyî kerdo xo çeng. Seba ke ma verê provokasyonan bigêrê ma tedbîran genê. Ma wazenê vera dişmenî şer bikerê ke no dişmenê pîrik û pîrkalanê ma yo. Ma nê wazenê wa şer bibo şerê kurd vera kurdî. La her çî pabesteyê ma ma nîyo. Rixmê heme vengdayîş û hîşyarkerdişê eke tayî bikewê mabênê ma û dişmenî bêşik ma nêewnîyenê hesranê çimanê înan ra. La ma bi berpirsîyarî têgêrenê. Embazî ganî na babete de hîşyar bê û bi berpirsîyarî nêzdî bê.

Şerê estbîyayîş û azadîye

Embazî nika tna Şikefta Birîndara, Kurojahro, Çiyareş, Çemço û Werxelê de şer nêkenê. Raşto ûca şer kenê la heme şarê kurdî înan teqîp keno.  Zerrîya kurdan û dostanê ci ûca erzena. Nê zî pê çalakîyanê paştdayîşî ramojenê. Ganî bizanê ke na dewayêka tarîxî ya.  Dewaya şarê ma, dewaya şaran a. Dewaya azadîye û demokrasîyî ya. Ganî ma bi nêzanayîşî nêzdî bê. Ça beno wa bibo çîyo ke hewce keno ganî bêro kerdene. No şerê estbîyayîş  azadîye yo. Serkewtişê Zap û Avaşînî serkewtişê heme şaranê herême yo. Serkewtişê ûcayî do dewrêkê neweyî bido destpêkerdene. No têkoşîn semedê her kesî bimbarek o. Ma pê bawerê ke embazî do tîya tarîxêkê neweyî binusê û bi felsefeya Rayber Apoyî serra 2022î bikerê serra serkewtişî.

Bi nameyê Qerergahê Merkezî ma heme embazan bi nê bawerî, hêvî, heskerdiş û hurmetî selam kenê, heme embazan rê zerrî ra serkewtiş wazenê.''