Hemserekîya Konseya Rayberdişî ya KCKyî derheqê hêrişanê îşxalî yê dewleta tirke de eşkerayîyêke daye. Eşkerayîye wina ya:

''Hêrişê çinkerdişî yê dewleta tirke 14ê nîsana 2022yî de bi hêrişê vera Zapî derbazê safhayêka newîye bîye. Dewleta tirke pê nê hêrişan wazena îradeyê gerîlayan bişikna, Têgêrayîşê azadîye tasfîye bikera û polîtîkaya qirkerdişê kurdan temam bikera. Ma venga şar, cinîyan, ciwanan, şaranê Rojhelatê Mîyanênî, dostanê şarê xo û rayaumûmîya demokratîke danê ke vera hêrişanê îşxalî yê dewleta tirke bi xurtî tewir bimojnê, hetê xoverdayîşê fedayî yê gerîlayan de ca bigêrê û her ca de xoverdayîşî pîl bikerê.

Gerîlayanê azadîye vera hêrişan bi hawayêkê fedayî dest pê xoverdayîşî kerd û derbê giranî dayî dişmenî ro. Ma nê xoverdayîşê gerîla û fermandaranê HPG û YJA-Starî selam kenê û fîraz kenê. Ma embazanê xo yê şehîdan bi rêzdarî, minet û heskerdişî yad kenê. Gerîlayanê Azadîye yê Kurdîstanî tim hêrişê dişmenî bi xoverdayîşê fedayî şiknayî, planê dişmenî pûç kerdî û heman wextî de îradeyê azadîye aver berd.

Dewleta tirke wazena pê eciqnayîşê gerîlayan qirkerdişê kurdan temam bikera û estbîyayîşê kurdan bi temamî werte ra wedarna. Nê hêrişê qirkerî pê xoverdayîşê topyekûnî yê şar û gerîlayan eşkîyenê bêrê çinkerdene. Eke dişmen her ca de hêriş keno ganî şar û hêzê xoverdayîşî zî her ca de bi hawayêkê aktîfî xo ver bidê û têkoşîn bikerê. Ganî şarê ma bi ruhê xoverdayîşî yê gerîlayan hêrişan bişiknê, her ca de nêrazîbîyayîşê xo bimojnê û çalakîyan bikerê. Nika şarê kurdî prosesê merg-mendişî de yo. Ma wayîrê ê hêzî yê ke dişmenî çin bikerê. Hêzo rêxistinkerde yê şarî pêro çekan, tank û bombayan ra bihêzêr o.Sey şar û têgêrayîşê azadîye erkê ma yo ke ma bi ruhê xoverdayîş û têkoşînî plananê dişmenî çin bikerê.

Şarê ma yê Başûrê Kurdîstanî ganî vera nê hêrişan nêrazîbîyayîşê tewr pîlî bido. Nê hêrişî vera Başûrî û destkewteyanê pêro kurdan ê. PKK û gerîlayî seba ke qey azadîya kurdan têkoşîn kenê û destkewteyan pawenê benê hedefê dewleta tirke. Şarê Başûrî ganî hetê gerîlayan de ca bigêro û vera hêrişanê îşxalî wurzo payan ser. Îradeyê azadîye û destkewteyê Başûrî wina do bipawîyê. Êyê ke estbîyayîşê gerîlayan sey bahaneya îşxalî mojnenê hemkarîya dewleta tirke kenê û erjanê kurdan pêşkêş kenê. Nê xayînî bêguman estbîyayîşê gerîlayan verê xo de sey astengî vînenê.

Ciwanê Kurdîstanî wa bi ruhê fedayî û xoverdayoxî yê gerîlayan her ca de bi çalakîyanê xurtan cewabê hêrişan bidê û derbe bidê dişmenî ro. Ciwanî wa hetêkî ra tewrê gerîlayan bibê, hetê bînî ra zî çalakîyan bikerê. Ciwanî artêşa pawitişê kurdan û Kurdîstanî yê. Ganî ciwanî vera nê hêrişan bêveng nêmanê, bi metodanê afernayoxan û dewlemendan çalakîyanê bitesîran bikerê, her ca de bidê dişmenî ro. Kêna û lajê Kurdîstanî wa pabeyê fermanî çewî mevinderê, înîsîyatîfê têkoşînî bigêrê. Hêrişê faşîzmê AKP-MHPyî û îşxalî bi yewîya ciwan û gerîlayan do bêrê şiknayene.

Ciwanî pawitoxê şar û erjanê azadîye yê. Ciwanê Kurdîstanî yê şorişgêr û welatperwerî bi wayîrvejîyayîşê nê erkî û mesuldarîya tarîxî eşkenê roşê xo bîyarê ca. Ciwanî ganî her ca de şerî pîl bikerê, derbanê giranan bidê dişmenî ro, xoverdayîşî vila bikerê. Ciwanê kurdî ganî xo sey gerîlayan bivînê û wina têbigêrê. Nê esasî ser o ciwanê Kurdîstanî her ca de bi ruhê xoverdayîşî ganî çalakîyan bikerê û cewabê hewceyî bidê dişmenê faşîstî.

Cinîyê kurdî bi xurtkerdişê xoverdayîşî û ruhê azadîye têkoşînî xurtêr kenê. Vera hêrişanê faşîzmê AKP-MHPyî, cinîyî pê rolanê girîngan têgêrayî. Vera hêrişanê îşxalî yê dewleta tirke zî cinîyî do serkêşîye bikerê û çinkerdişê hêrişan de bi aktîfî têbigêrê.

PDK bi paştdayîşê hêrişanê dewleta tirke raşta raşye mîyanê planê îşxalî de ca gêno. Nê hêrişan de ca girewtiş vera dewaya kurdan îxanet o. PDK vano ê paştî nêdanê hêrişanê îşxalî yê dewleta tirke la no xapînayîş o. PDK Hewlêr û Behdînan de verê nêrazîbîyayîşê kurdan de beno asteng. Dişmenê kurdan Erdoganî paştdayîşê înan ra semed PDKyî rê sipas kerd. No zî mojneno ke tewirê PDKyî çita yo. PDK îstîxbarat dano dewleta tirke, destekê lojîstîkî dano û pê ablukaya vera gerîlayan mîyanê nê şerî de ca gêno. Hêrişê îşxalî pê îstîxbaratê PDKyî yenê kerdene. Xora artêşa tirke nêeşkayêne hewayî ra hêzanê xo Kuro Jahroyî de bîyara war coka binê pawitişê PDKyî de, Şêladizê ra erdî ra leşkerê xo ardî war. No zî eşkera keno ke PDK kamyew aste de hemkarîya dewleta tirke keno. Sere de şarê kurdî ganî her kes vera hemkarîya PDKyî vindero.

Sere de roşnvîr, hunermend û nuştoxê kurdî, ganî pêro merdimê komelî vera hêrişanê îşxalî tewirê xo bimojnê û afernayîşê nêrazîbîyayîşî de serkêşîya komelî bikerê. Hunermend, nuştox û roşnvîrê kudî wayîrê a mesuldarî yê ke manaya hêrişanê îşxalî dewleta tirke komelî rê vajê û bidê famkerdene. Roşnvîr û hunermendî ganî hemkarîya bi dişmenî teşhîr bikerê û komelî roşnî bikerê. Qalkerdişê raştîye û mojnayîşê tewirê raştikênî de mesuldarîyêka pîle kewena serê milê roşnvîr û hunermendan.

Eke şarê Tirkîya kedkarî vera hêrişanê faşîzmê AKP-MHPyî tewirê xo bimojnê û hetê şarê kurdî de cabigêrê, no çi yeno manaya sosyalîstbîyayîş, demokratbîyayîş û azadîwaştişî. Şarê Tirkîya û pêro azadîgîr, demokrat, edîlî û têkoşerî ganî na raştîye bizanê û goreyê ci vera îşxalî têbigêrê. Coka ganî 1ê Gulane bêro kerdene roja tewirê vera îşxalî.

Dewleta tirke têna Kurdîstanî û şarê kurdî hedef nêkena, wazena polîtîkaya îşxalî pêro Rojhelatê Mîyanênî de vila bikera. Dewleta tirke seba ke PKK seba wayûbiratîya şaran têkoşîn keno, ey hedef kena. Naye ra ganî sere de erebî şarê Rojhelatê Mîyanênî vera hêrişanê îşxalî yê dewleta tirke tewirê xo bimojnê.

Yewîya Ereban vera hêrişanê îşxalî yê dewleta tirke tewirê xo mojna. No tewirê înan ercîyaye yo. Tewirê hukmatê Iraqî qels û oportunîst o la wexto ke hêzê sîyasî yê ereban û dewletanê înan vera hêrişanê îşxalî yê dewleta tirke tewirê xo mojnenê, no zî seba vindrnayîşê polîtîkayanê dewleta tirke baş beno.

Ganî baş bizanîyo ke dewleta tirke pê paştdayîşê hêzanê mîyanneteweyîyan nê hêrişan kena. Paştdayîşê înan ra nêbo dewleta tirke nêeşkayêne hêriş bikera û çekanê kîmyewîyan bişuxilna. Hêzê mîyanneteweyî vera şerê Ukrayna yê la vera hêrişanê îşxalî yê dewleta tirke bêveng manenê. Ganî şarê dinya û rayaumûmîya demokratîke nê raştîyan bivînê.

Ma venga pêro kesanê ke vera hêrişanê îşxalî yê dewleta tirke bêveng manenê û paştî danê dewleta tirke danê ke nê tewirê xo ra fek vera bidê û vera îşxalî tewirêkê zelalî bimojnê.

Nê hêrişê îşxalî yê dewleta tirke xêrê xoverdayîşê çêrî yê gerîlayan ra, bi têkoşînê şarê Kurdîstanî, cinî, ciwan, kedkar û demokratan do bêrê pûçkerdene. Kesê ke seba azadîye û demokrasî têkoşîn kenê do ser bikewê.''