Fermandarîya Pêroyî ya YPJyî derheqê serkewtişê Zîndanê Sinaa yê Hesekê de eşkerayîyêke daye. Eşkerayîye wina ya:

''Ma şexsê embaze Awaze Efrîn de pêro şehîdanê xo yad kenê û soz danê ke Şorişê Rojawanî pîl bikerê.

Cergê DAÎŞî seba ke dewleta Îslamî ronê bi serran o hêrişê cinî û şaran kenê. 20ê çeleyî de zî înan hêrişê Zîndanê Sinaa yê Xiwêranî kerd. Bêguman dewleta tirke ê fînanse kerdî. Tesaduf nîyo ke no hêriş roja îşxalê Efrînî û serrgêra ronayîşê Îdareyê Xoserî de ame kerdene. Hêzanê YPJyî taxa Xiwêranî de vera hêrişê cergan têkoşînêko pîl kerd.

Seba çareserîya meseleya DAÎŞî qet yew dewlete mesuldarîye nêgirewte xo ser û wayîra hemwelatîyanê xo nêvejîyaye. Neteweyanê Yewbîyayeyan (NY) tewirêk nêmojna. Bi taybetî NY meseleya Eşbal El Xilafe de mesuldarîya xo bivîno. Her çiqas ma tehlukeyê pîlbîyayîşê DAÎŞî asteng kerd zî tehluke dewam keno û mesuldarîye milê her kesî de ya.

Hêzanê ma QSD û Koalîsyonê Mîyanneteweyî reyde 7 rojan têkoşîno hempar kerd. Rixmo ke cerganê DAÎŞî hêrişê sivîlan kerdêne û şar sey tirsê gandarî şuxilnayêne hêzanê ma bi hawayêkê baldarî hamleya xo arde ca. Serrgêra xelisnayîşê Kobanê de hêzanê ma reyna DAÎŞ bin kerd û operasyon bê zerarê vera sivîlan qedîna.

Roja ronayîşê YPJyî ra nata YPJ seba asayîşê cinîyan, şar û nê erdî xîret keno. Hemleya Gurzê Şaran de zî YPJyî bi nê ruhî cayê xo girewt û taxa Xiwêranî de fedakarîya xo mojnaye. Na hemle de embaze Awaze Efrîn şehîd bîye. Senî ke Arîne Mîrkan Kobanê de û Avesta Xabûr Efrîn de morê xo dayo binê şorişî embaze Awaze zî Hesekê de rêçê şehîdan de şer kerd. Reyna xeylêk embazanê ma na hemle de ca girewt, bi çêrî şer kerd û şehîd bîyî.

Ma soz danê ke seba azadîya şar û welatê xo rêçê şehîdanê xo de şorê, seba ke erjanê şorişî û destkewteyan bipawê ma do mîyanê amadekarîyêka pîle de bibê. Ma txanê Xiwêran, Neşwa, Zihurî û şarê Hesekê rê seba ke hetê hêzanê ma de bîyî sipas kenê. Reyna ma HPC JIN û Hêzanê Asayîşê Cinîyan rê zî sipas kenê ke na hemle de ca girewt. Ney zî eşkera kerd ke cinîyî  asayîşê erd, şar û aramîya şorişî yê.''