25ê hezîrane de cerganê dewleta tirke kincê YPG-YPJyî xo rê dabi û Kobanê de qirkerdiş kerdbi. YPJyî Qirkerdişê 25ê Hezîrane yê Kobanê pê eşkerayîyêke yad kerd.

Eşkerayîya Fermandarîya Pêroyî ya YPJyî wina ya:

''Dewleta tirke ya îşxalkere ya ke destkewteyê Şorişê Rojawanî hezm nêkerdî cinîyan kena hedef. Bi nê hawayî Rojawan de xeylêk qirkerdişî kerdî. Qirkerdişê Kobanê yê 25ê Hezîrane zî nê qirkerdişan ra yo ke tewr bêbext o. Na roje reşe de bi desan cerganê dewleta tirke ya îşxalkere kincê YPJ-YPGyî xo rê dayî, ameyî Kobanê û qirkerdişêko xedar kerd. Nê hêrişî de embazê ma Mîtra, Rojava û Sorxwîne şehîd bîyî.

23ê hezîrana emserî de zî reyna cinîyê rayberî ameyî hedefkerdene. Nê hêrişî de Koordînasyonê Kongreya Starî ya herêma Firatî Zehra Berkel, Hebûne Mele Xelîl û Emîne ameyî qetilkerdene. Artêşa tirke ya îşxalkere do rastê cewabêkê xurtî bêra. 

Dewleta tirke ya îşxalkere destkewteyanê Rojawanî ra tersena. Coka hende hêrişê Rojawanî kena. La ganî dewleta tirke hol bizana ke heta ke cinîyê têkoşerî yê şorişgêrî estbê xeyalê ci do qet nêro ca. Ma sey fermandar û şerwananê YPJyî soz danê pêro cinîyan û şarê xo ke ma do rêçê şehîdan de qet yew hêriş bêcewab nêverdê. Ma şarê xo rê vanê ke wext wextê qesasî yo. Ma reyna pêro şehîdanê xo pê mînet û rêzdarî yad kenê û sozê mendekerdişê şorişî danê merdimîye.''