Bi wesîleya 8ê Adare Roja Cinîyan ê Kedkaran a Dinya YPJyî merasîmêko leşkerî serûber kerd. Fermandara Pêroyîye ya YPJyî Newroze Ehmed, Fermandara YPJyî Axîne Efrîn, Meclîsê Pawitişê Xabûrî yê Asûrîyan Madlene Xemîs, Meclîsê Leşkerî yê Dêra Zorê ra Lîlva Abdullah, Fermandara Tabûrê Nûbar Ozanyanî Zabele Kobanê tewrê merasîmî bîyî.

Merasîm de verî Newroze Ehmed qisey kerd û vat: ''Ma 8ê Adare yê pêro cinîyan fîraz kenê. Cinîyan netîceya xoverdayîşêkê pîlî de na roje viste destî. Ma pêro cinîyan ê şehîdan şexsê Silava û Bêrîvanana de bi rêzdarî yad kenê. Têkoşîn û xoverdayîşê înan do tim rayîrê ma roşnî bikerê û ma rê bibê bingeyê azadîya pêro cinîyan. Rayber Apo nika Zîndanê Îmraliyî de seba pêro cinîyan û merdimîye xo ver dano. Bi fikr û feslefeya Rayber Apoyî ma ewro têkoşînê xo berz kenê û artêşbîyayîşê xo xurtêr kenê. 

Seke hêrişanê vera Zîndanê Sinaa yê Hesekê de qewimîya hêzanê serdestan waşt cergan reyna gandar bikerê la xîretê înan ameyî pûçkerdene. Ewro pêro dinya de cinîyî mîyanê serewedaritişî de yê. Rayberîya cinîyan ê kurdan de têkoşînê ma têkoşînê cinîyanê dinya rê bi hêvî. Seba ke cinîyî wayîrê nasnameyê xo vejîyenê hertim maruzê hêrişan manenê. No zî eşkera keno ke azadîye asan nîya, pê bedelan yena girewtene. Embazê ma bi ruhê çêrî şinê serê dişmenî, ma zanenê ke dewaya azadîya cinîyan hînî bêwayîr nîya. Têkoşînê cinîyan na aste viste destî. Ma do qetî îmkan medê ê kesanê ke wazenê armanc û xeyalê cinîyan çin bikerê.

Hende bedelanê giranan ra dima serkewtişî ra ber ma rayîrêkê bînî nêşinasnenê. Ma na roje sozê xoverdayîş, serkewtiş, destvistişê azadîye newe kenê. Çunke cinîyan ê têkoşeran ra ber kes çin o wayîrê nê mîrasî vejîyo. Ma do herêmanê îşxalkerdeyan bixelisnê, rêxistinîya xo hîra bikerê. Ma venga pêro cinîyanê dinya danê ke wext wextê azadîye, xo rêxistinkerdişê cinîyan o û hînî ney ra apey gameştiş çin o. Nê esasî ser o ma do herêmanê îşxalkerdeyan destê dewleta tirke ya îşxalkere ra bixelisnê. Azadîye û têdûştîye ra ber ma çîyêkê bînî nêşinasnenê.''

Merasîm bi slogananê 'Cinîye, Cuye, Azadîye', 'Bi can, bi gonî ma to reyde yê Serek', 'Bê Serek cuye nêbena', 'Şehîdî nêmirenî' qedîya.