Fermandarîya Pêroyî ya Yewîyanê Pawitişî yê Cinîyan (YPJ) nasnameyê hîrê şervanan eşkera kerdî ke Vakurê Kurdîstanî ra tewrê refanê YPJyî bîyî û tarîxane cîya cîyayan de şehîd bîyî.

Eşkerayîye de nê ameyî vatene: ''Şorişê Rojawanê Kurdîstanî semedê rêxistinbîyayîşê heme şaranê bindestan firsetêk afirna. Şorişî çar parçeyanê Kurdîstanî de xebera cuyeya newî daye. Ewro zî hema  vera DAÎŞî têkoşîn yeno kerdene. Bi Şorişê Rojawanê Kurdîstanî sînorê netewe-dewlete ameyî wedaritene, heme şarê ke azadîye wazenê bîyî yew. Cinîyan ê ciwanan zî bi tewrbîyayîşê xo hêz da ronayîşê sîstemê netewa demokratîke.

Hemrayê ma Berware, Şîmale û Arjîne vera sîstemê qirkerdişî yê Tirkîya vejîyayî û semedê ronayîşê komelê azad û demokratîkî tewrê Şorişê Rojawanê Kurdîstanî bîyî. Hemrayê ma Berware, Şîmale û Arjîne tarîxanê cîya cîyayan de hemleyanê azadîye de tewrê kerwanê bêmergan bîyî.

Hemraya ma Berware Dilxwez (Halime Yaşar) 2011 de Geverî ra tewrê têkoşînê azadîye yê Kurdîstanî bîye û 2014 de cepheyê Til Koçerî de, xoverdayîşê vera DAÎŞî de şehîd bîye.

Hemraya ma Arjîne Mêrdîn (Surgune Taş) 2014 de Vakurkê Kurdîstanî ra  tewrê refanê YPJyî bîye û 11ê çeleyê 2026î de Dêrik de tewrê kerwanê bêmergan bîye.

Hemraya ma Şîmale Zîlan (Sevgî Bahar Yildiz) zî Elbakê Wanî ra tewrê refanê şorişî bîye û 3ê adara 2016î de hemleya azadkerdişê Holî de tewrê kerwanê şehîdan bîyî.

Ma do sey Yewîyanê Pawitişî yê Cinîyan keyeyanê erjîyayeyan ê hemrayanê xo Berware, Şîmale û Arjîne rê û heme şarê xo yê welatperwerî rê serweşîye wazenê û soz danê ke ma do semedê pawitişê Şorişê Cinîyan ê Rojawanê Kurdîstanî têkoşînî xurtêr bikerê.''