Fermandarîya Pêroyî ya Yewîyanê Pawitişê Cinîyan (YPJ) derheqê çeteyanê DAÎŞî de ke dewleta tirke ya îşxalkere seba ke vera gerîlayan şer bikerî Başûr de ca kerdî, eşkerayîye daye. Eşkerayîye de ya ke Çatrayîrê El Neîmî ya Reqa de ameye dayene Endama Fermandarîya Pêroyî ya YPJyî Sozdar Dêrik û Vervatoxa YPJyî Ruksen Mihemed û Hemsereka Konseya Pawitişî ya Kantonê Reqa Semîra Ehmed tewrê ci bîyî.

Eşkerayîya erebkî hetê Semîra Ehmed û kurdkî hetê Sozdare Dêrik ra ameye wendene. Eşkerayîye de ame vatene ke  cepheyo ke vera têkoşînê şaran ameyo akerdene tede DAÎŞ zî ameyo cakerdene û nê ameyî vatene: ''Qirkerdişê DAÎŞî yê ke Sûrîye, Irak, Şingal, Kurdîstan û Ewropa de kerdî hema mezgê pêro komelan û rayapêroyîye de yê.  Bi hezaran cinîyê êzidîyan remnayî, bi hezaran merdimî ganî ganî kerdê mezelan. Vera êzidî, xirîstîyan, kurd, ereban û neteweyanê bînan qirkerdişê girdî kerdî.

Bi hezaran hemrayê ma bi hewayêkê fedayîtî şehîd bîyî. Ma bi hewayêkê qerardarî şer kerd û xoverda, DAÎŞ cografyaya xo de bin fîna û hûzûrê şarê xo ard ca. Ewro dewleta tirke ya îşxalkere seba ke herra Başûrî îşxal bikero herêmanê Metîna û Zap de seba ke vera gerîlayanê azadîye şer bikerî Zaxo, Dihok û Ameidyê de çeteyê DAÎŞî ca kerdî.  Dewleta tirke senî ke bi çeteyanê DAÎŞî û çeteyanê bînan Rojawanê Kurdîstanî îlhak kerd, ewro zî wazena eynî wina Başûrê Kurdîstanî îlhak bikero. Dewleta tirke ya îşxalkere pîya bi çeteyanê DAÎŞî û hemkarîya keyeyê Barzanî, bi çeteyanê Gulan û Zêravanî Başûrê Kurdîstanî îşxal kena.

Gerîlayanê azadîye Şingal, Kekûk, Mexmûr û Hewlêr de şarê Başûrê Kurdîstanî û Iraqî vera wehşetê DAÎŞî pawit. Nika verê çeteyan dîyeno eynî waran û vera gerîlayanê azadîye dîyenê şerkerdene.  Şarê Başûrî zî zano ke Barzanî bi xo veng da gerîlayan ke wa Hewlêrî bipawê.  Barzanî ewro bi kam yew rîyî seba ke vera gerîlayan azadîye şer bikerî çeteyanê DAÎŞî Başûr de ca keno. Çîyo winayên nîno qebulkerdene. Na meseleya anorî ya. Ganî şarê Başûrê Kurdîstanî nê  îxanet û îşxalî qebul mekero.

Ma Kobanê de pîya bi peşmergeyan û enternasyonalîstan vera DAÎŞî şer kerd û ser kewtî, ewro zî  ganî ma bi eynî rûhî heme Kurdîstan û Rojhelatê Mîyanênî û dinya bipawê.Wa heme dinya bizano ke hêrişê ke DAÎŞÎ Iran, Rûsya, Paris, Almanya, Afrîka û Ewropa de kerdî pêro merkezê Anqara de ameyî plankerdene, hetê Erdogan û MÎTî ra ameyî koordînekerdene û nê hêrişî dewam kenê.

Erdogan DAÎŞî sey cepheyê stratejîk û bitehlukeyî vera DAÎŞ û dinya şuxilneno. Coka ganî pêro dinya paştî bido Gerîlayanê Azadîye yê Kurdîstanî. Vera nê hêrişan bêvengmendiş yeno manaya qebulkerdişê wehşet û qirkerdişan. Ma sey YPJyî senî ke ma Rojawan de vera çeteyan şer kerd ma do nika zî ma her ca de semedê pawitişê şarê xo çarçewaya xopawitişê meşrûyî de têkoşînê xo bi hewayêkê radîkalî xurt bikerê.''