YPS JIN serrgêra ronayîşê xo ya hewtine û 8ê Adare Roja Cinîyan ê Kedkaran a Dinya pîroz kerdî û sozê xo yê pîlkerdişê têkoşînî û girewtişê qesasî newe kerd. Eşkerayîye de nê ameyî vatene.

''Cinî komelî kena komel û bi ercanê ci yê xoseran ana têhet. Çunke cinî  ehleq a, wijdan, ziwan, kultur a. Bi nê taybetîyanê xo komelî game bi game afirnena, seba ke ke merdimîye mîyanê hûzûrî de biciwîyo, bi heme hêzê xo têkoşîn kena. Sîstemo ke wazeno komelî semedê menfeatê xo bişuxulno, verî no rol û mîsyonê cinîyan destê înan ra girewt û cinî kerd bêerce. Rayber Apoyî cinî resna ercanê ci yê xoseran  û zemînê têkoşînî afirna. Serrgêra hewtine ya ronayîşê YPS JIN û 8ê Adare Roja Cinîyan ê Kedkaran a Dinya sere de Rayber Apo, şarê Kurdîstanî û  heme cinîyan rê pîroz bo ke vera faşîzmî têkoşîn kenê.

Îqtîdarê AKP-MHPyî yo ke ci rê çînkerdişê ziwan û kulturê kurdan qîm nêkerd, serra 2015-2016î de seba ke hetê fîzîkî ra zî kurdan biqedîno dest pê planê çokdayîşî kerd. Vera nê xoverdayîşê xoîdarekerdişî dîya despêkerdene.  Nê demî de hêz û fedakarîya cinîyan reyna ame dîyene. Cinîyê ke kuçe-kuçe, taxe-taxe xo rêxistin kerd, wezîfeyê xo biserkewtişî ardî ca. Xoverdayîşê xoîdarekerdişî yo ke Sûr, Nisêbîn, Cizîre, Şirnex ame destpêkerdene û Vakurê Kurdîstanî ra ame vilakerdene hukmato faşîst bêçare verda. Coka faşîstan cinîyê şorişgêrî hedef girewtî û Pakize, Sêvê, Fatma, Asya û Dayîke Taybete qetil kerdî. Bi nê waşt ke ruhê têkoşînî bişikinê la hewtî ra heta hewtayî şarê kurdî şahadetê nê cinîyan ê şorişgêran na xo doşî ser û bi sloganan jin Jiyan Azadî mewzîyê xoverdayîşî zimnayî.

Rejîmê faşîstê ke Cizîre de şar ganî vêşna, ewro şar binê rijnayîşê erdlerzî de verda. Eslê xo de îqtîdar bi xo binê rijnayîşê erdlerzî de mend. Seba ke şar reyna binê rijnayîşî de memano konfederalîzmo demokratîk, sîstemê xoîdarekerdişî hewce keno. Îqtîdar bi serran o keno ke şaranê Tirkîya biverdo yewbînan la erdlerz de bi paştîdayîşê şaran nê planê îqtîdarî ame betalkerdene. No zî mojneno ke şar eşkeno vera faşîzmî videnro û wayîrê heqanê xo bivejîyo. Ma sey cinîyan do têkoşînê vera faşîzmî rê serkêşîye bikerê. Ma do şarê xo nê fîravunan rê meverdê, hesab bipersê.

Heta azadîya fîzîkîye ya Rayber Apoyî ma do mevindê. Ma do faşîzmî serûbin bikerê. Şexsê serkêşanê xoverdayîşê xoîdarekerdişî fermandare Zeryane de ma heme şehîdanê xo rê serrgêra ronayîşê xo ya hewtine û 8ê Adare Roja Cinîyan ê Kedkaran a Dinya de sozê xo newe kenê. Ma do mewzîyanê xoverdayîşê ke şima heta dalpaya peyên a gonîya xo tede têkoşîn kerd, çirey  cameverdê û dişmenî ra hesab bipersê.''