Prosesê janê vîrusê Korona de pêro dinya de şîdetê vera cinîyan zêdîya. Kurdîstan û Tirkîya de zî heman rewşe qewimîyaye. Cinîyî prosesê janî de keye de rastê şîdetî ameyî, mergê şikdarî yê cinîyan zêdîyayî.

Endama Meclîsê Cinîyan ê HDPyî û Hemşaredara verêne ya Akdenîzî yê Mersînî Yuksele Mutlu derheqê babete de ANFyî reyde qisey kerd. Yuksele îfade kerd ke ganî şîdetê vera cinîyan bibo rojdemo verên ê dinya. Yuksele vat: ''Çunke no şîdet unîversal o ke tewir bi tewir xo mojneno ra. Cinîyî hetê fîzîkî, psîkolojîk, ekonomîk û cînsî ra marûzê şîdetî benê. Serdestîya camêrdan cinîyî pey goş kerdî û heta nika serdestîya xo dewam kerde. La nika her cayê dinya de Komunanê Parisî ra heta karkeranê cinîyan ê Amerîka têkoşînê cinîyan esto. 

Yuksele pare kerd ke ganî vera sîstemê serdestîya camêrdan cinîyî bibê wayîrê paradîgmaya têkoşînî û vat: ''Paradîgmaya ma esta. Paradîgmaya ma paradîgmaya ekolojîke, demokratîke û azadîwaştox a. Embazê ma cinîyî zîndanan de, meydanan de xo ver danê têkoşîn kenê. 

Cinîyî tim benê hedefê şîdetî û qetil benê. Wezîfeyê partî, rêxistin, dezgehan o ke her ca de têkoşînê cinîyan zêdêr bikerê. Dewlete û îqtîdar wezîfeyê xo nêanê ca, heta tedaya cinîyan kenê. Qeyûman dezgehê ma padayî. Ma goreyê paradîgmaya xo vera naye do têkoşîn bikerê. Cinîyî bêsîgorta yenê xebitnayene, cinîyê karkerê serrewextî binê şertanê xiraban de xebitîyenê. Derheqê nê meseleyan de xebatê ma estê. Seba ke hîşmendîya cinîyan aver şora ganî ma perwerde bidê, rêxistinanê cinîyan awan bikerê û esasê azadîya cinîyan ser o komelan ronê. Ma eşkenê her ca de xo rêxistin bikerê. Îqtîdar zî naye ra terseno. La se keno wa biko ma do têkoşînê xo ra fek vera nêdê.  Eke ma têkoşîn nêkerê şîdet û tedaya vera cinîyan do bizêdîyê. Serkewtişê cinîyan nêzdî yo.''

Yuksele derheqê Gulîstane Doku de zî qisey kerd û vat: ''Derheqê Gulîstane Doku de xebatê ma dewam kenê. Heta faîl bêro dîyene, cezakerdene ma do têkoşînê xo dewam bikerê. Îqtîdar vera cinîyan şerêkê taybetî keno. Ganî embazê ma yê cinîyî xo têkilîyanê winasênan ra dûrî bigêrê. Coka cinîyî ganî birêxistin û hîşmend bibê. Seba ke serebûtêko newe yê sey ê Gulîstane Doku nêqewimîyo ganî ma têkoşîn bikerê.''