Kadroyê serkêşî yê PKK’yî û Têgêrayîşê Azadîye ra Zîlane (Zeynep Kinaci), hemverê hêrişanê îmhakerdişê fîzîkkî yê serê Rayberê Şarê Kurdî Abdullah Ocalanî de, 30’ê Hezîran a 1996 de bi çalakîya fedaîye cewab da. Sere çalakîya Kinaci ra 23 serrî ravêrtî, bi hezaran Zîlanî ameyî dinya û tewrê têgêrayîşê azadîye bîyî. Xeylî Zîlanî ewro zereyê refanê PAJK û YJA de mucadele kenê û sere şopa Zeynep Kinaci de rayra şinê.

 Zîlan Tendureke (Sûltan Tûrane)

Sûltan Tûrane, 1996 de gama ke Zîlane Dêrsim de çalakî virazena yena dinya. Sûltane mîyanê gerîlayan de wendiş û nûştiş mûsena, xebatanê gerîlatîye de ca gêna. Êlula 2015’î de, Hemleya Şehîd Reşît Serdarî de şehîd kewena. 

Zîlan Qamişlo (Zîlan Sarike)

Nameyê aye yo rastekên Zîlan Qamişlo, nameyê aye yo qod Zîlan Sarike yo. Zîlan Qamişlo seba ke hetkarîya aye seba keyeyê ci bibo hetêk ra perwerde gêna, hetêna ra zî xebetêna. Zaf kewena binê tesîrê şerê Rojawanî, perwerdeyî û karê xo ca verdana, tewrê refanê PKK’yî bena. Zîlan Sarike nêeşka şiro Efrîno ke waştêne şer bikero, wareyê Şehîd Kendalî yê Heftanînî de, Teşrîna Peyêne ya 2018’î de şehîd kewena.

Zîlan Stêrke (Kanîye Yildize)

Gama ke tarîx Tebax a 2016’î ramojneno, hem seba Hemleya 15’ê Tebaxe û hem zî hemverê tecrîdê serê Rayberê Şarê Kurdî Abdullah Ocalanî de Fermandarîya Wareyî ya Dêrsimî hemverê dewleta Tirkî ya îşxalkare de, hemverê nuqteyanê aye de çalakîyêka zaf hîra virazena. Çalakîye ra dima sazîyê Tirkan kewtîbî wina halêk ke hendî nêeşkayêne bixebetîyê. Qehremana na çalakîye ra yewe zî Zîlane bîye. Tam zî goreyê layîqê nameyê xo, Dêrsim de çalakîye de bîye Zîlan Stêrke. Kanîye Yildiza ke Mîdyadê Mêrdînî ray a, mekteba ke bîya cayê înkar û asîmîlasyonî ca verdana û Nîsan a 2014’î de tewrê refê PKK’yî bena.

Zîlan Devrane (Nûrşen Bûtûşaba)

Nûrşen Bûtûşabaya ke Sûrê Amedî de amîya dinya dimayo ke lîse qedênena dest bi xeberdarîye kena. La seba ke no qîm nêkeno dimayo ke xoverdayîşê xoîdarekerdişî dest pêkeno tewrê xoverdayîşî bena. Zîlan Devrane 27’ê Teşrîna Peyên a 2018’î de cuya xo vînî kena. Verê şehadetê xo serrêk ra vêşêr mîyanê gerîlayan de mucadele kena.

Zîlan Rûkene (Belkis Sevîme)

Belkîs Sevime mîyanê keyeyêkê koçerî yê Sêrtî de yena dinya, keyeyê ci wazeno a bido zewecnayene. La goş dana pêşnîyarê maya xo ke ci ra vana “Yan ti do tewrê partîye bibê, yan zî ti do bizewecîyê, sewbîna rayîr çino!” A zî 2014 de verê xo dana ver bi koyî. Xerzan û Amed de gerîlatîye kena. 

Zîlan Pîroze (Kader Ete)

1996’an de xeylî cinîyê ke wayîrê hişmendîya Kurdistanî yê no name dayo keynayanê xo. Kader Ete 1996 de Sêrt de yena dinya û Tebax a 2013’î de tewrê PKK’yî bena, nameyê Zîlan Pîroze gêna. Zîlan Pîroze 2016 de, Colemêrg de şerêk de şehîd bena.

Zîlan Vejîne (Leyla Nase)

Leyla Nase yanî Zîlan Vejîne serra 2014’î de Xerzan de tewrê refanê PKK’yî bena û nameyê Zîlan Vejîne gêna. Bê ke poşman bibo yan zî teredut bikero fek mamostetîya Tirkî ra vera dana, tewrê raywanîya gerîlayan bena. Xerzan de bena peyrewa Mizgîn û Arjînan.

Zîlan Serhildane (Şehrîvan Kiymaze)

Seba Şehrîvan Kiymaz a ke bajarekê Girêmîra yê Nisêbînê Mêrdînî de amîya dinya, gerîlabîyayîş „xeyalêk“ bi. Seba ke nê xeyalê xo bica bîyaro, Mêrdîn ra tewrê refanê PKK’yî bena û kewena rayîrê Wareyê Pawitişî yê Medya. Îdîaya aye ya tewr pîle na bîye ke „bibo sey Zîlane“ ke nameyê aye girewtibi. Teşrîna Verêne ya 2015’î de xeyalê aye rîyê qezayêk ra nêame ca. Zîlan Serhildane peyê xo de Zîlanê neweyî verdayî.

Zîlan Serhate (Emîne Aygune)

Keynaya ewtaraye ya Serhedî Zîlan Serhede hîsanê xo serê defterê xo de wina nûştê: Çîyo ke mergî keno manîdar cuye ya. Gama ke merdimî merdimanê ke zaf hes kenê ra benê cîya, zerra çende seba înan bivêşo zî gama ke ma înan anê xo vîrî seke ma timî înan dir ê, seke hemrayê şima ciwîyenê şima ewnênê înan ra. Ma yeqîn nêkenê ke ê çinê. Çîyo ke verê ma de embazîye, hemrayîye hêzdar keno qayde yê, qaydeyê ke ma bi hawayêkê wuşkî pabesteyê înan ê.”

Zîlan Rûkene (Mercan Sevîme)

Zîlan Rûkene yanî Mercan Sevîme Sêrt de amîya dinya, 2003 de tewrê refanê gerîlayan bena. Dezayê aye yo ke 1990 de şehîd bîyo nameyê Mercane dano aye. Hewna a game de vano na keyna do bibo cinîyêka xurte. Zîlane maceraya xo ya azadîye bi porê xo yê bereqnayeyî, bi rîyê xo yê peşmiryayeyî Botan de dana destpêkerdene, Dêrsim de, yanî wareyê Zîlane de qedînena. 

Zîlan Penabere (Nesîbe Ozbeke)

Zîlane koçberêk a, la zerrîya aye qe erdê aye ra cîya nêbîya, qe koç nêkerda. Bi vatişê “Ez hetê xo bidî kamcîn kîşte zî axir agêrena yena serê welatî. Ancax ez şarê xo rê bibî hemraye ez do bieşkî bibî Zîlane.” Wina verê xo dana ver bi meterîsanê azadîye. Nameyê Zîlane û beyraqa aye dewrê înan ê dimayê xo kena.

Zîlan Amede (Kader Çîftçî)

Zîlan Amede ke vana, “Mi dest bi macerayêka azadîye kerde û heta mumkun bo ez do na raywanîye bi serkewtişî biqedênî. Ez do şirî Dêrsim û bibî Zîlane.“ Bi bawerîya ke serewedartişê zerrîya aye ra bena berze ke do Dêrsim de bo kewena rayîr. Rayîr derg û çetin o. La tu hêz yan zî tu çetinî nêeşkena aye rayîrê aye ra dûrî bifîno. Çunke aye sey gêjan aşiqa cuye ya, zerrîya aye bi eşqî dana piro. 

Şîîrêka Zîlan Pepûle:

“Ez Pepûle ya sînornênas a

Seba azadîya şarê xo

Kogêrayoxêka bejnebarî ya

Bi çek û bi rext a

Ez Zîlan a, umîdê Rojakewtene ya”

 Ewro koyan de macerayê Zîlanan dewam kenê. Bi desan, belkî bi seyan Zîlanî nika koyanê Kurdistanî de rayra şinê. Ewro mayî hewna zî nameyê aye sey nîşanêkê pîlî yê anorî danê domananê xo.