Zîlane Ciwanro şaristanê Ciwanroyî yê Rojhelatê Kurdîstanî de yena dinya û keyeyêkê feodalî de bena pîl. Na hîşmendîya serdestîya camêrdan bi hawayêkê xirabî tesîrê Zîlane û wayanê ci kena. Wexto ke keyeyê ci waşt ke aye û di apkênayanê ci pê zorî bizewijno, Zîlane na rewşe qebul nêkena û kena ke rayîrêkê çareserîye bivîna. Gerîla Zîlane rewşa xo wina ana ziwan:

''Keyeyê ma de heqê vatişê cinîyan çinbi. Serdestîya camêrdan zaf pîl bîye. Na zî tesîrê mi, wayan û dadîya mi kerdêne. Rewşa merdimanê mi yê cinîyan zî heman bîye. Wexto ke keyeyê mi waşt ke ma pê zorî bizewijno ma kewtî cigêrayîşê rayîrêkê çare.''

Zîlane o çax fikirîyena ke ganî keyeyî ra tay dûr bibê. Xalê aye zî na rewşe ra îstîfade keno û wazeno ke Zîlan û apkênayê ci tewrê DAÎŞî bikerê. Zîlan û apkênayê ci yê ke nêzanayêne DAÎŞ çi yo, pêşnîyazê xalî qebul kenê.

Zîlane vana: ''Xalê mi seba menfaat û pereyî waştêne ke mi tewra DAÎŞî bikero. Mi vatêne qey xalê mi seba holîya mi kerdêne. Coka mi waşt ke ez tewra DAÎŞî biba û hînî azad biba. Mi waştêne ke tedaya keyeyî ra bixelisa. La êyê ke waştêne ma tewrê DAÎŞî bikerê seba menfaatanê xo ma eştêne mîyanê adîrî. Zaf ciwanî wina xepîyayî. La şansê min o ke mi Têgêrayîşê Azadîye şinasna. Keyeyê ma de zî zaf ciwanî tewrê Têgêrayîşê Azadîyî û felsefeya Rayber Apoyî bîyî. La zaf ciwanî zî estê ke tewrê DAÎŞî û hêzanê rejîmê Îranî bîyî. Heta ke ma tewrê têgêrayîşî bîyî ma partî nêşinasnayêne. Keyeyê ma zî seba ke ma têgêrayîş nêşinasnê ma asteng kerdêne. Ma mîyanê têgêrayîşî de Rayber Apo û partî nêzdî ra şinasnayî.

Tewrbîyayîşê mi de tesîrê Şehîde Zîlane Gabar pîl o. Êyê ke Zîlan şehîd kerde hemkar û notir bîyî. Zîlane dima ke xeylêk notirî kiştî şehîd bîye. Dima ke ma pê ney hesîyayî ma pê xo bawer kerd û ma waşt ke tewrê têgêrayîşî bibê. Armancê min o verên girewtişê qesasê Zîlane yo. Notiranê eşîra ma a şehîd kerde. Ez do înan ra hesaê ney bipersa. 

Ez venga pêro ciwananê Rojhelatê Kurdîstanî dana ke pê sîyasetê Îranî hîşyar bibê, vera îşkence û tedayan bêveng nêmanê. Ciwanro de zaf ciwanî seba pereyê kundoxî sey ajan yenê xebitnayene. Wa ciwanî binê tesîrê Besic, Wahhabî û Spayîpastaran de nêmanê. Wa bêrê tewrê Têgêrayîşê Azadîye, Têgêrayîşê Rayber Apoyî bibê. Wa nê zulmî qebul nêkerê. Wa bêrê û embazî, yewî, edaletê na cuye tam bikerê.''