Bêrîvane Hêjar hema doman bîye zîndan de maruza îşkence û tedaya rejîmê Îranî bena û wexto ke zîndanî ra vejîyena ver bi koyan şina. Bêrîvane Hêjar serra 2016î de tewra YRKyî bena. Bêrîvane ANFyî rê qala hîkayeya xo ya têkoşînî kerde.

Bêrîvane şaristanê Makoyî yê Rojhelatê Kurdîstanî de yena dinya û keyeyêkê welatperwerî de bena pîl. 10 serrî dibistananê rejîmê Îranî de wanena. O çax rîyê tedaya rejîmê Îranî ya vera cinîyan û kurdan ra kewena peyê cigêrayîşan. Bêrîvane Hêjar wexto ke doman bîye gerîlyan şinasnena û tesîrê înan de manena. Hînî a zî wazena tewra înan biba. O çax Ronahî Denîz çalakîyêka fedayîye kena û na çalakîye tesîrê Bêrîvane kena. Hînî çew nêeşkeno verê aye de vindero. Bêrîvane firsendêk vînena û şina koma gerîlayanê Dambatî. Tîya de 3 menga manena û dima erşawîyena Kelareş. Pastarî hêrişê noqtaya gerîlayan kenê. Bêrîvane û di şerwanê bînî benê esîr.

Bêrîvane hîkayeya xo wina dewam kena: ''Pastaran ma rê îşkence kerd û tedaya psîkolojîke kerde. Ez newe tewra gerîlayan bibî, serra mi zî qijkek bîye. La mi waştişê dişmenan nêardî ca. Mi xo rê xoverdayîşê zîndanî yê Şîrîne Elemhulî sey esas girewtbi. Mi vatêne se beno wa bibo ez do teslîmê dişmenan nêba. Dima înan ez berda zîndanê Nisvanî ya Urmîye. Mi rê îşkenceyê giranî kerdî.  Pastaran persayêne ke cinîyî senî şinê koyan. Mi zî vatêne rîyê tedaya şima ra ez şîya koyan, heqê mi yo ke ez şarê xo, welatê xo bipawa. Zîndan de 6 mengî înan xebere nêdaye keyeyê mi.''

6 mengan ra dima pastarî Bêrîvane benê mehkemeya dardekerdişî la seba ke serra ci qij a, aye darde nêkenê. Ci rê cezaya zîndanî ya di serran danê. Bêrîvane tesîrê îşkenceyanê zîndanî de manena, wazena ke cade zîndanî ra bivejîya û tewra gerîlayan biba. 

Bêrîvane vana: ''Esîrbîyayîşê dişmenan mi rê zaf giran ameyêne. Seba ke ez qesasê şehîdan bigêra daymîş nêbîyêne. Dima ke ez zîndanî ra vejîyaya reyna tewra gerîlayan bîya. Ez wazena ke qesasê embazanê xo bigêra. Esasê felsefeya Rayberîye de ez xo aver bera û heta peynîye ez do perwera nê rayîrî biba. Ez venga ciwananê Makoyî dana ke heta ke xo bikişê, neçareyî ra xo bivêşnê wa bêrê tewrê gerîlayan bibê. Bi taybetî ez venga cinîyanê eşîra xo dana ke wa cuya koletîye qebul nêkerê, wayîrê îradeyê xo bivejîyê û tewrê felsefeya Rayberîye bibê. 

Cuya gerîlatîye zaf rind a. Seba ke ez tewra gerîlayan bîya kêfweş a. Mi tîya de sey yew cinîye bîya wayîra îradeyê xo.''