Ewropa de çalakîyê protestokerdişê tecrîdî û paştdayîşê grevê vêşanîye dewam kenî. Vizêr reyna xeylî bajaranê Awûstûrya, Fransa, Îtalya û Danîmarka de çalakîyî ameye viraştene.

GRAZ: Bajarê Grazî yê Awûstûrya de bi çalakîyêk tecrîd ame protestokerdene û xoverdayoxê grevê vêşanîye ameyî silamkerdene. Çalakîye de derheqê tecrîd û grevanê vêşanîye de vilawekî ameyî vilakerdene û bêvêngîya Ewropa ameye şermezarkerdene.

LÎNZ: Bajarê Lînzî de zî bi heman waştişî Kurdistanijî û dostê înan kuçeyan de bî.  Çalakwanan bi pankart û sloganan da zanayene ke waştişê xoverdayoxanê grevê vêşanîye waştişê înan o û waşt ke tecrîd bêro wedartene.

VÎYANA: Paytextê Awûstûrya Vîyana de zî semedê baleantişê tecrîdê serê Ocalanî çalakîyêk ameye viraştene. Çalakîya ke hete Merkezê Cimatê Kurdî yê Demokratîkî ra ameye organîzekerdene, hetê çepî yê Tirkîya û Awûstûrya û anarşîstî zî tewrê ci bîyî û grevan rê wayîr vejîyayî.

MÎLANO: Bajarê Mîlano yê Îtalya de rayraşîyayîşo ke vera nîjadperestîye ame viraştene, Kurdistanijan zî tede cayê xo girewt û faşîzmê dewleta Tirkî û bêvêngîya Ewropa şermezar kerdî.

KOPENHAG: Paytextê Danîmarka Kopanhag de zî bi çalakîyêk tecrîd ame protestokerdene û grevê vêşanîye ke rayberîya Leyla Guvene de ameyî despêkerdene ameyî silamkerdene. Çalakîye de ame vatene ke waştişê xoverdayoxanî waştişê înan o û heta wedartişê tecrîdî çalakîyê înan do dewam bikerê.

LA ROCHELLE: Bajarê La Rochelle yê Fransa de zî vera tecrîdî çalakîyêk ameye viraştene. Qiseykerdişê de ame vatene ke vera DAÎŞî Trûmp nê Ocalan bîyo serkewte û bale anciyaye muhîmîya xoverdayîşê Kurdan ser.