Îsraîl û Îran 13ê hezîrane ra nata hêrişê yewbînan kenê. Îsraîlî 13ê hezîrane de hêrişê Îranî kerdibi û şerî wina dest pêkerdibi.

Servîsê Hetkarîya Lezgîne ya Îsraîlî Stêrka Dabutî vizêr şewe bi eşkerayîyêke da zanayene ke sere de Hafya û Tel Avîv de xeylê merkezê enerjî û dezgehê umûmîye bi fuzeyan ameyê hedefkerdene. 

Hafya de hêrişê fuzeyan ra merkezê ceyran, petrol û binawanîye de teqayîşî qewimîyayî. Ajansê Servîsê Lezgînî yê Neteweyî yê Îsraîlî (Magen David Adom-MDA) bi eşkerayîyêke dîyar kerd ke hêriş de 3 kesî merdî, 74 kesî birîndar bîyî.

Îranî zî Îsraîlî de Sersefîrîya Berze ya Amerîka kerde hedef. Ancî Îranî de kesêk seba ke ‘MOSSADî rê ajanîye keno’ ameyo dardekerdene.

Wezîrê Pawitişî yê Îsraîlî Israel Katzî telegram de eşkerayîyêke daye û vat: ‘’Dîktatorê Tehranî xo nimneno û Îsraîl de hêrişê sivîlan keno. La roniştoxê Tehranî do bedelê ney bidê. Wext nêzdî yo.’’