Şaredarîya Rignano Flaminioyî ya Îtalya  Xelata Hemwelatîbîyayîşê Rûmetî dabî Rayberê Şarê Kurdî Abdullah Ocalanî. La şert û mercanê janî ra semed nêeşkabî merasîmê xelatî bikera.

Vizêr bi merasîmêko ke Şaredarê Rignano Flaminioyî Fabio di Lorenzi, hetkarê şaredarî û endamê encumenê şaredarîye tewrê ci bîyî, xelate teslîmê Komîteya Kurdan ameye kerdene.

Dima merasîm de qala têkoşînê şarê kurdî û paradîgmaya Sîstemê Konfederalî yê Demokratîkî yê Ocalanî ameye kerdeme. Şaredar Lorenziyî pare kerd ke ê kêfweş ê ke na xelate daya Abdullah Ocalanî.

Lorenziyî da zanayene ke ey kitanê Abdullah Ocalanî wendî û çîyê ke ey 16 serrî verî vat ewro derbazdar o. Lorenziyî vat: ''Paradîgmaya Abdullah Ocalanî semedê çareserîya meseleya kurdan û semedê averşîyayîşê demokrasî yê Rojhelatê Mîyanênî û Tirkîya zaf girîng a. Nika Tirkîya hêrişê kurdan kena û Rayberê Şarê Kurdî zîndan de tepişnena. No nêno qebulkerdene. Welatê rojawanî (Ewropa) semedê çareserîya na mesele ganî têbigêrê.''

Dima Endamê Komîteya Kurdan zî qisey kerd û şarê Rignano Flaminioyî rê sipas kerd. Ey ard ziwan ke heta azadîya Abdullah Ocalanî wa şaredarîye paştî bida înan.

Simonetta Cirsciya ke nameyê Komîteya 'Wext Wextê Azadîye Ocalanî yo' tewra merasîmî bîye, da zanayene ke serrêk a ê semedê azadîya Abdullah Ocalanî xebitîyenê û 2ê teşrîna verêne de zî Strasbourg de bibê.

Peynîya merasîmî de beşdaran pîya fotografî girewtî û sloganê 'Viva Ocalan' vatî.