Qezaya Gimgimî ya Mûşî de ‘’Festîvala Cinîyan, Xoza û Kulturî’’ dewam kena. Festîvale dîyarîya Ekîne Wan (Kevsere Elturk) ameye kerdene.

Cinîyan ewro bi sloganê ‘’Jin, Jiyan, Azadî’’ rayraşîyayîş kerd. Cinîyî festîvale de standanê xo akenê, xeymanê ekolojî û jineolojî nanê ro. Cinîyan vat: ‘’Ma do rêxistinbîyayîşê xo xurtêr bikerê û bi nê hawayî festîvale ra vejîyê.’’

Beşdaran ra Kevsere Akçelîk vat: ‘’Ê wazenê ke erdê ma merdiman ra xalî bikerê û sermayedaran rê war verdê. Ma vera teşhîrkerdişê bedenê Ekîne sereyê xo wedarit. Ma polîtîkayanê vera cinîyan qebul nêkerê. Ma bi hawayêkê kolektîfî tîya de yê.’’

Evîne Taşdemîr vat: ‘’Herêma Serhedî de ewro ma festîvalêke kenê. Na festîvale seba ma qîmetîn a. Cinîyî tîya de meseleyanê xo nîqaş kenê. Qiseykerdiş û nîqaşkerdiş seba ma pêroyînan ê. Na noqta de ganî çalakîyê winayênî bizêdîyê.’’