Şaristanê Sydneyî yê Awustralya de serrgêra şorişê Rojawanî amî pîrozkerdene. Pîrozkerdişo ke hetê MCDK’yî ra ame organîzekerdene, temsîlkarê partîyanê sîyasîyan, parlamenterî, Kurdistanijî û dostê înan tewrê ci bîyî.
Pîrozkerdişo ke bi deqeyêkê hurmetgirewtişî dest pêkerd hemserekanê Federasyonê Cimatê Kurdî yê Demokratîkî û Merkezê Cimatê Kurdan ê Demokratîkî qiseykerdiş kerd. Qiseykerdişan de ame vatene ke şorişê Rojawanî seba şaranê dinya umîdêk o ke newe ra bîyo zergûn.
Parlamentera Partîya Zergûnan a Awustralya Jaime Parkere zî vat, “rojêka wina manîdare de verê şima de bîyayîş seba mi anor o. Ez şorişê Rojawanî bi hurtmet silam kena. Ez binê posterê Birêz Ocalanî û şehîdanê ke mîmarê nê şorişî yê xîtabê şima kena. Seba mi no zaf manîdar o. Ewro hêzo ke hemverê barbarî û terorê DAÎŞ’î de hemeyê merdimîye paweno hêzê YPG û YPJ’yî yo.
Parkere îşxal û qirkerdişê Efrînî yê ke dewleta Tirkî ûca kerdê zî şermezar kerdî û vat ke ewro yeno waştene ke bicaardişê bi nê qaydeyî hemeyê Kurdistanî de bibo.
Parkere ard ziwan ke ê sey partî hemverê gîrîyayîşê PKK’yî mîyanê lîsteya terorî vejîyayê û tîya ra tepîya zî do vejîyê. Parkere vat, “PKK, ewro hemverê peydemendeyanê DAÎŞ’î de mucadeleyê azadîye dano û ganî Birêz Ocalan cade bireso azadîya xo.”
Dimayê qiseykerdişo ke serê nameyê Yewîya Sosyalîste ame kerdene, serê Skype ra fermandarêka YPJ’yî beşdaranê şewe rê qisey kerd. Şewe de Hozan Xanemir û grûba ci sehne de ca girewt.
