Almanya seba ke çeteyê DAÎŞ’î yê hemwelatijê ci yê ke destê YPG’yî de yê pêyser nêgîro, bi hawayê lezkanî qanûnanê xo vurnena. Hemparanê hukmatî, seba ke hemwelatîya endamanê DAIŞ’î betal bikerê kerd têsere.
Lîdera partîya CDU’yî Annegret Kramp-Karrenbaûere vîzêrî nê perê venga Wezîra Edaletî Katerîna Barleye dabi û waştbi ke wa heqê hemwelatîye yê endamanê DAÎŞ’î yê Almanya bêrê betalkerdene. CDU/CSU wazeno ke bi nê qeydî endamanê DAIŞ’î yê hemwelatijanê xo ra bixelesîyo.
Qaso ke yeno zanayene, bi zextanê pîlan ê Kramp-Karrenbauere Partîya Sosyal Demokrate (SPD) ra wezîr Barleye amadekerdişê pêşnameyê qanûnêkê winayênî tesdîq kerdo. Reyna goreyê xeberanê NDR, WDR’yî û rojnameyê "Suddeutsche Zeîtungî", Wezîrê Karanê Zereyî Horst Seehofer û Wezîra Edaletî Barleye, derheqê qanûnî de kerdo têsere.
HÎRÊ ŞERTÊ QANÛNÊ NEWEYÎ
Peşnameyê qanûnî do roja verê ma de pêşkêşê Meclîsê Federalî bibo û bêro reydayene. Peşnameyo qanûnî tena seba DAIŞ’îyan nîyo. Goreyê peşnameyê qanûnîyî kesê ke wayîrê heqê ciftwelatîye yê û endamê rêxistinanê terorîyê, do hemwelatîye ya înan a Almanya bêro betalkerdene.
Seba peşnameyî hîrê şertî yenê dayene:
Betalkerdişê hemwelatîye ya Almanya do tena seba kesanê ke wayîrê heqê çiftwelatîyî yê derbaz bibo.Çunke goreyê Peymana Heqanê Merdiman a Netewanê Yewbîyayîyan a ke Almanya zî qebûl kerda, ganî merdim bêwelat nêbo û nêro verdene.
Keso ke hemwelatîya ci bêro betalkerdene, ganî hetê serran ra pîl bê. Heqê hemwelatîya domanan ganî nêro betalkerdene.
Qanûn seba deme verî derbaz nêbeno. Yanê qanûn do tesîrê cî bî endamanê DAIŞ’î yê nikayî bibo.
Tesîrê qanûnî bi çend DAIŞ’îyan bibo nêno zanayene. Ewro Surîye, Iraq, Tirkîya û Yunanîstan de 70 hemwelatijê Almanya yê endamê DAIŞ’î hepisxaneyan de yê. Îdarekarê Rojawanê Kurdîstanî zî beyanatanê xo de vanê, zêderîyê înan cinî û domanî 200 hemwelatijê Almanya destê hêzanê YPG/QSD’yî de yê.
Qaso ke yeno vatene, qanûn tena tesîrê xo nêmusno çeteyanê DAÎŞ’î. Çunke qanûn de yeno vatene ke, “ Ê yê ke tebere welatî de beşdarê rêxistinanê terorîyan bîyê”. Nê rêxistinî kamcîyê, ê do bi qerarê Wezaretê Karanê Zereyî bêrê eşkerakerdene.
Bi taybetî zî medyaya komelê çepe ya Almanya de yeno vatene ke, qanûn do hemwelatîjê Almaya yê ke beşdarê YPG’yî bîyê ser tesir bikero. YPG Almanya de statuyê rêxistinê terorî de nîyo, la menga Adare ya serra 2017’î de, bayraqê YPG’yî hetê Wezaretê Karanê Zereyî ra ameybî qedexekerdene.
