Çarçewa safhaya diyîne ya Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de 16ê teşrîna peyêne de Koln de rayraşîyayîş û mîtîngêk do bêrê kerdene. 

Amadekarîyê teknîkî yê rayraşîyayîş û mîtîngî şaristanê Kolnî yê Almanya de, Merkezê Komelê Demokrakî yê Kurdan ê Kolnî de dîyayî destpêkerdene.

Hemserekê KCDK-E Zubeyde Zumrut û Engîn Sever, Hemsereka KON-MEDî Emîne Rûken Akça, Hemserekê FED MED NRW Ahmed Kobanê, endamê TCŞ, TekoJIN, KOMAW, siyasetmedar Lezgîn Botan û Hozan Comerd tewrê karanê amadekarîye bîyî. 

Zubeyde Zumrut ard ziwan ke ê wextêkê dergî ra nata seba rayraşîyayîşê Kolnî xebitîyenê û vat: ''Ma do bi se hezaran kesan pêşwazî bikerê. Ma hê amadekarîyanê xo qedînenê. Ma do nê tecrîdî bişiknê. Ma do şarê xo reyde yew bibê û Rayberê xo azad bikerê.''

Engîn Severî vat: ''Ma selamê Rayber Apoyî girewtî. Wextê ci ameyo ke ma cewab bidê selamê Rayber Apoyî. Ma her roje  seba rayraşîyayîş û mîtîngê Kolnî xebitîyenê. Ma do şarê xo yê Ewropa biresnê Kolnî. Ma do bibê vengê Rayber Apoyî û çareserîya meseleya kurdan xo rê bikerê esas.''

Emîne Rûken Akça dîyar kerd ke 16ê teşrîna peyêne de warê Kolnî de bi hezaran kesî do mesajê xo bidê û vat: ''Wa dewletê îşxalkerî hêzê ma bivînê.''

Ahmed Kobanêyî vat ke ê bi seferberî xebitîyenê.

Nameyê KOMAWî ser o dayîke Şengê vat: ''Wa pêro şarê ma tewrê rayraşîyayîşê Kolnî bibo.''

Dima girseyî pîya Koln de esbafî zîyaret kerdî, broşur û vilawekî vila kerdî. Sîyasetmedar Botanî vat: ''Ma hêzê xo yê Ewropa bikerê yew, wa dinya vengê ma bieşnawa. Ma pîya Koln de bê.''