Çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de xeylêk huqûqnasî vera tecrîdî nêrazîbîyayîşê xo mojnenê. Rojanê peyênan de avûkatanê Baroyê Parisî zî seba şermezarkerdişê tecrîdî Wezîrîya Edaletî rê mektubêke şawite. Avûkatê fransayîjî François Devedjianî derheqê babete de ANFyî rê qisey kerd.

François Devedjianî dîyar kerd ke tecrîdê Îmraliyî binpaykerdişê heqanê merdiman o û parçeyêkê polîtîkaya înkarkerdişê kurdan o. François Devedjianî vat: ''Abdullah Ocalan temsîlkarê kurdan o. La Tirkîya verê heqanê nê temsîlkarê kurdan de hûrmet nêkena. Dewleta tirke Ocalanî ser ra binpaykerdişê heqanê merdiman rayîr a bena.

 Sey Baroyê Parisî ma na rewşe şermezar kerde û waşt ke peynîya naye cade bêra ardene. Tecrîdê Îmraliyî parçeyêkê polîtîkaya înkarkerdişê kurdan o. Ewro ma nêzanenê ke Ocalan weş o yan merde yo. Heqê pêro tepişteyan est o ke keye û avûkatanê xo bivînê. Tirkîya bi tecrîdî vana ke a Abdullah Ocalanî muxatab nêgêna, çin hesibnena.''

François Devedjianî tewirê Konseya Ewropa û Komîteya Vergirewtişê Îşkenceyî (CPT) yê vera tecrîdê Îmraliyî rexne kerd û vat: ''CPTyî hema zî raporê xo yê serê Îmraliyî eşkera nêkerdo. CPTyî tewr peyên derheqê Azerbaycanî de birêka îstîsnayîye daye û eşkerayîyêke daye rayaumûmîye. Heman çi ganî seba Tirkîya zî bêro kerdene. Ganî CPT derheqê tecrîdê Îmraliyî de eşkerayîye bida rayaumûmîye.''

François Devedjianî bale ante Hemleya Azadîye ser û vat: ''Na hemle seba azadîya Abdullah Ocalanî zaf girîng a. Abdullah Ocalan Mandelayê kurdan o. Abdullah Ocalan eşkeno haştîye bîyaro û meseleya kurdan çareser bikero. La tecrîdê Îmraliyî mojneno ke Tirkîya nêwazena heqanê kurdan bişinasna û pêkerdişêkê haştîyaneyî bikera. Coka ganî ma seba azadîya Ocalanî bixebitê. Ganî hêverî destûr bêro dayene ke Ocalan bieşko avûkatanê xo bivîno.''