Platformê Cuye yê Vera Tecrîdî yê Ewropa eşkerayîyêka nuştekîye daye û bale ante serê xoverdayîşanê grevê vêşanîye yê ke rayberîya Hemsereka KCD’yî û parlamentera HDP’yî ya Colemêrgî Leyla Guvene dest pê kerdê û ame vatene, “Sere de rewşa weşîya Leyla Guvene û heme çalakwananê grevê vêşanîye her ke şina xirabêr bena. Ma qesewete kenê ke do kesêk bimiro.”

Platformî ard vîrî ke, Guvene seba ke Rayberê şarê Kurdî Abdullah Ocalan o ke binê tecrîdê girankerdeyî de yeno pêgirewtene avûkat û keyeyê xo reyde  pêvînayîşan bikero dest bi grevê vêşanîye kerd û wina ame vatene, ”Waştişo ke Guvene seba ci 125 rojî yo grevê vêşanîye de ya,  heq  o ke qanûnê Tirkîya danê heme girewteyan ra yew o. Çi heyf ke Tirkîya nê serranê peyênan de huqûq û edelatî ra dûrî kewta, heme qedemeyanê îdareyî de keyfîyîye bîya hakim.

Netîceyanê bêhuquqîye bi şeklêkê tewr giranî kesê ke hepisxaneyan de manenê ciwîyenê. No semed ra çalakîya grevê vêşanîye ya ke Leyla Guvene seba wedaritişê tecrîdî yo ke cayê  ci  tu huquqêk de çin o daya destpêkerdene, vera heme bêhuquqîyan ê ke Tikrîya de dewam kena de xoverdayîşêk o.

Sîstemê serekîye yê otorîterî yê Erdoganî de, Tirkîya de xoserîya mehkemeyan bi temamî mîyan ra ameye wedaritene, verê parlamentoyî ame girewtene, vengê çapemenîye ame birnayene, kesê ke paştdayîş nêdanê îqtîdarî “Xayînê welatî” yenê îlankerdene.

Leyla Guvene, seba ke bawer kena wedaritişê tecrîdî do Tirkîya de berê haştîye û demokrasî a bikero cuya xo eşte rîsk û çalakîya xo dewam kena. Kesê ke bawerîya ci bi haştîye û demokrasî esta, ganî goşdarîya waştişanê Leyla Guvene bikerê. Haştîye û azadîye, Tirkîya de hewcedarîya şaran a tewr acîl a. Tecrîd, verê çareserîya persa Kurdî gêno û şîdetî zêdneno.

Sere de Almanya û welatê Ewropa, Tirkîya reyde têkilîyê ekonomî û sîyasî yê pêtî ronayê, naye ra ganî verê bîyayîşan ê ke Tirkîya de benê de tewir bigêrê. Çareserîya persa Kurdî tena seba Tikrîya ney, seba hem Rojakewtena Mîyanêne û hem zî Ewropa zaf muhîm a.

Ma vengdayîş bi hêzanê demokratîkan ê Ewropa kenê ke paştdayîş bidê Leyla Guvene û bi nê rengî Tirkîya de rêxistina demokrasî û haştîye xurt bikerê.

Seba çalakîya ke 15’ê Adare 2019 de, roja Îneyî de saete 10:00 de do dest bikero û 24 saetî dewam bikera, ma vengdayîşê heme demokrat, akademîsyen û welatperweran kenê ke tewrê çalakîye bibê.”