Berlin de çalakîya roniştişî ameye destpêkerdene

Berlin de bi waştişê wayrîvejîyayîşê xoverdayîşê zîndanano ke vera tecrîdê Îmraliyî yeno rayraberdene, çalakîya roniştişî ameye destpêkerdene.

Bi vengdayîşê Hemserekîya Dîwanê KCDK-E meydanê Alexanderplatzî yê paytextê Almanya Berlinî de çalakîya roniştişî ameye destpêkerdene ke do panc rojan de gruba newîye dewr bigero.

Eşkerayîye de ame vîrardene ke 120 zîndanê Vakûrê Kurdîstanî û Tirkîya de sîyasîyan ê kurdan ê ke mîyanê înan de wekîlê HDPyî, rojnameger û sîyasetmedarî zî estê vera sîstemê Îmraliyî û polîtîkaya qirkerdişê sîyasîyî grevê vêşanîye da destpêkerdene ke bi hezaran tepişteyî çalakîye de yê.

Çalakîya ke binê varayîşê vewre de ameye destpêkerdene de Hemserekê KCDK-E Yuksel Koçî nê vatî: ''Grevê vêşanîye ke şertanê zehmetan ê zîndanan de yenê kerdene eynî wextî de xoverdayîşê merdimîye yo.  Ma zî tîya ra paştî danê nê xoverdayîşî ke tim pîlêr beno û vanê ke waştişê înan waştişê ma yê.  Gereka pêro dezgehê ke hetê demokrasîyî û azadîye de yê, sîyasetmedarî, roşnvîr û hunermedî vera faşîzmî paştî bidê xoverdayoxanê zîndanan. Ma zî seba ke berpirsîyarîya xo bîyarê ci dest pê çalakîye kenê.''

Temsîlkara Aveg KONî Serpîle Aslanî zî vat: ''Grevê vêşanîye ke vera binpaykerdişê heqan ê tepişteyan û tecrîdê serê birêz Ocalanî yeno kerdene ke wekîlî Çaglare Demîrel û Sebahate Tuncele zî tede yê. Îqtîdaro faşîst ê AKP-MHPyî senî ke nimûneyê Leyla Guven de zî ame dîyene her kes ke wazenê nefes bigero tepişeno û bi mehkemeyanê korsanan ceza dano ci. Ma hem seba ke Ewropa de caardişanê rejîmê faşîstê teşhîr bikerê hem zî wayîrê tepişteyan bivejîyê tîya ameyî têhet.''

Parlamenterê Eyaletê Berlinî Hakan Taş zî ard ziwan ke ê sey Dîe Linke do xoverdayîşê tepişteyan teqîp bikerê.