Paytextê Almanya Berlin de sey her serre emser zî menga sibate de rayraşîyayîşo derg yeno serûberkerdene. Roja yewîne ya rayraşîyayîşê dergî vizêr qedîyaye.

Rayraşîyayîşî saete 11:00 de Meydanê Kottbusser Torî yê Kreuzbergî de dest pêkerd û binê varanî de zî bi coşêkê pîlî dewam kerd. Şar bi pankarta ''Azadîya Ocalanî azadîya ma ya'' ya bi ziwanê almankî nêzdîyê 5 kîlometreyan rayîrî ra şî. Bêmabên bi ziwanê kurdkî û almankî sloganî ameyî vatene û komloyê vera Rayberê Şarê Kurdî Abdullah Ocalanî ame protestokerdene.

Rayraşîyayîş Alexder Platz de qedîya. Hemsereka Meclîsê Komelê Kurdistanijan ê Azadan ê Berlinî Nûjîyane Gunay qisey kerd û vat: ''Heta ke Rayber Apo azad nêbo sere de cinîyî şarê ma û merdimîye do azad nêbê."

Gunaye seba prosesê diyînî yê rayraşîyayîşê ewroyî venga kurdîstanijan da ke beşdarê rayraşîyayîşî bibê û paştî bidê ci.

Nameyê komîteya amadekarîye ya çalakîya Berlinî zî Îsmaîl Parmaksizî qisey kerd.

Parmaksizî îfade kerd ke polîsanê Berlinî destûr da ke nêmeyê qirseyî eşkenê posterê Ocalanî bikirişnê û vat: "Tewrbîyayîş çend zêde bibo fotografê Rayber Apoyî zî hende zêde benê. Êyê ke Rayber Ocalanî ra hes kenê û ey teqîb kenê ganî siba tewrê rayraşîyayîşî bibê.''

Beşê ewroyî saete 11:00 de Kurfustendam de do dest pêbikero.