Bild: Merkele lîsteya dawetî sey waştişê Erdoganî kerde

Rojnameyê Bildî pare kerd ke Serekwezîre Merkele lîsteya dawetbîyayeyan ê Konferansê Lîbya goreyê waştişê Erdoganî amade kerde.

19ê çeleyî roja yewşemeyî de paytextê Almanya Berlin de kombîyayîşêko mîyanneteweyî do bêro kerdene. Seba Konferansê Lîbya yo ke Almanya serûber keno bi dawetê Serekwezîre Merkele lîderê zaf dewletan û temsîlkarê dezgehan ê mîyanneteweyîyan Berlin de do kom bibê.

Konferansî ra 2 rojan verî rojnameyanê girîngan ê Almanya ra Bildî dawetê konferansî ser o bale ante xeberêke ser. Goreyê xebera hûmara îneyî ya rojnameyî Serekwezîre Angela Merkel babeta dawetbîyayeyanê konferansî de goreyê tedaya Serekkomarê Tirkîya Recep Tayyîp Erdogan têgêrîyaye.

Xebere de ame eşkerakerdene ke Merkele goreyê waştişê Erdoganî lîsteya dawetbîyayeyan amade kerde. Rojnameyî kişf kerd ke Erdoganî bi taybetî seba beşdarbîyayîşê Yunanîstanî teda kerde û na babete de ser kewt.

Atînaya ke verê cû waştêne beşdarê konferansî bibo labelê nêame dawetkerdene, vera hukmatê Merkele nêrazîbîyayîşê xo mojna. Wazîrê Karanê Teberî Nîkos Dendîaso ke verê na rewşe mat mend vat: "Ma fam nêkenê ke çira nêwazenê ma bibê beşêkê nê prosesî?''