Serrgêra Qirkerdişê Şingalî de bajaranê Bremen û Bielefeldî yê Almanya de çalakîyê şermezarkerdişî ameyî kerdene.

Bremen de çalakîya ke verê HBFî de ameye kerdene bi rêgirewtiîî dest pêkerde. Çalakîye de Koordînasyonê Êzidîyan ê Ewropa ra Cercur Cemîlî qisey kerd. Cemîlî bale ante ser ke qirkerdişê Şingalî de 5 hezar kurd ê êzidîyî ameyî qetilkerdene, 100 hezar înan hema şertanê zehmetan de kampan de ciwîyenê, 7000 kesî ameyî remnayene û vînîkerdene 400 hezarî ra zafêr kesî erdê ci ra ameyî raqilnayene, 2800 ra zafêr cinî û kênayê êzidîyan hema vînîbîyaye yê.

Cemîlî vist vîrî ke Belçîka û Hollanda qirkerdiş sey sûcê merdimîye nas kerd û vat: La rixmê nayî Almanyaya ke êzidîyî tewr zaf tede ciwîyene, hema polîtîkaya kor û kerre  rayra bena. Almanya ganî goreyê qanûnanê xo têbigero û berpirsîyarîya xo bîyaro ca. Seba ke qirkerdişê neweyî nêrê kerdene ganî Îdareyo Xoser ê Şingalî bêro naskerdene. Semedê nayî zî ganî kurdê ke Ewropa de ciwîyenê çiyo ke destê înan ra yeno bikerê.

Bielefeld de zî çalakîya xeyme roja diyîne de dewam kerde. Çalakîye de derheqê tekîlîya sîyasîye ya mabênê Almanya, DAÎŞ, Tirkîya û PDKyî, tehlukeyê vera Îdareyê Xoserî yê Şingalî û têkoşînê birumetî yê kurdan de zanayîş dîya. Çalakîye de semedê rayraşîyayîşo ke ewro do saete 17:00 de Îstasyonê Merkezî yê Bielefeldî de bêro kerdene, ame vengdayene.