Derheqê qerarê PKK terorîst nîyo yê Mehkemeya Berze ya Belçîka de Bruksel de kombîyayîşê çapemenîye ame organîzekerdene.  Avutkatê hetê kurdan, Hemserekê Kongra Gelî Remzî Kartal, Endamê Konseya Rayberdişî yê KNKyî Zubeyîr Aydar û parlamenterê Parlamentoyê Ewropa tewrê ci bîyî.

Qerarê PKK terorîst nîyo hetêkê şerî yo yê Mehkemeya Îstînafî yê 2018î hetê dozgerê federalî û avutanê tirkî ra amebi berdene Mehkemeya Berze ya Belçîka. 28ê çeleyî de îtaraz ame redkerdene qerarê Mehkemeya Îstînafî ame tesdîqkerdene. Têkoşînê PKKyî sey pêkewtişê biçeke yê mabênê kurdan û tirkan de sey hetêk ame namekerdene. Mehkemeyî vat PKK terorîst nîyo û Tirkîya de şer esto. Reyna ame vatene ke têkoşînê PKKyî  ganî çarçeweya huqûqê şerî yê mîyanneteweyî de bêro destgirewtene.

Parlamenterê Ewropa  No Qerar do Beranê Neweyan Abikero

Kombîyayîşê çapemenîye de verî parlamenteranê Yewîya Ewropa (YE)  qisey kerd. Hetkarê Serekê Grûba Yewîya Çepe  (GUE)  yê YE Nikolaj Villiumsenî vat: ''No qerarêko zaf girîng o. hukmatê Tirkîya ganî bi PKKyî semedê çareserîya sîyasîye yew masa de ronişo. Seba ke YE PKK sey terorîst îlan kerd, nê tewirî vernîya çareserîye girewt. Xeletîya YE na ya.''  Endamê Demokratanê Sosyalan yê YE  Andreas Schiederî zî bale ante muhîmîya qerarî ser û vat:  ''Problemêkê terorîzîm çîn o mesele cigêrayîşê heqî yo.''  Endamê Grûba Keskan ya YE  François Alfonsi zî vat: ''Nê qerarî semedê têgarayîşê kurdan berêko newe akerd. Ma do bixewtî ke no qerar heme welatan de bêro girewtene.''

Avûkat: Ganî PKK Lîsteya Terorî ra Bêro Vetene

Badê parlamenteran avukatan zanayîş da. Avukat Jan Fermonî no qerar semedê çareserîya meseleya kurdî sey gamêka girde name kerd. Avûkat Joke Callewaertî zî vat qerarêko zaf muhîm o. Avûkat Paul Bekaertî zî vat: 'Sûcdarkerdişê PKKyî heman wextî de vera heme kurdan bi. No qerar yeno no mana ke PKK ganî lîsteya terorî ya YE de mebo.'' Avûkat Luc Walleynî zî vist vîrî ke medyaya tirke bi serrano vana sîyasetmedarê kurdî û medyaya kurdan propagandaya PKKyî kenê  û vat ewro ra tepîya nêeşkenê bi naye kesî sûcdar bikerê. Avukatan waşt ke PKK lîsteya terorî bêro vetene û vat xora girewtişê lîsteyî zî sîyasî bi.

Kartal: Ganî Sazîyê Ewropa Goreyê Qerarî Têbigêrê

Remzî Kartalî zî qiseykerdişê xo de vist vîrî ke dewleta tirke bi paştdayîşê Ewropa hêrişê kurdan kena û vat: ''PKK vera terorê dewleta tirke ame ronayene. Şîdetê Tirkîya dewam keno la PKK kewt lîsteyê terorî yê Amerîka û Ewropa. Na neheqîye ya.  Polîtîkaya krîmînalîzasyonî ya vera kurdan hema dewam kena. Problem PKK nîyo bi bahaneyê PKKyî vera şarê kurdî hêriş esto. Ganî sazîyê Ewropa hînî goreyê qerarî têbigêrê.''

Aydar: Namekerdişê Terorî Neheqîye Bî

Zubeyîr Adyarî zî vat: '' Xora  PKK sey terorî namekerdiş xelet bi, neheqîye bî. Bi na lîste Ewropa de bi hezaran merdimê ma sey terorîst ameyî sûcdarkerdene. Na neheqîya girde ya. Ma hetêkê şerî yê. Ma hetê azadîya şarê xo yê. Ma wazenê ke mesela bi dîyalogî bêro çareserkerdene. No qerar do vernîya dîyalogî zî abikero. Belçîka ganî goreyê qerarî têbigêro û îmzaya xo yê lîsteya terorî peyser bianco.''