Endamê Konseya Rayberdişî ya KCKyî Zubeyîr Aydarî û Hemserekê KONGRA-GELî Remzî Kartalî derheqê hêrişanê îşxalî yê neweyan ê dewleta tirke de ANFyî rê qisey kerd.

Zubeyîr Aydarî ard ziwan ke zîyaretê Bexdadî yê Erdoganî ra rojêke verî nê hêrişî dîyayê destpêkerdene û vat: ''Erdogan armanc keno ke bi nê operasyonî tedaya Bexdadî û Hewlêrî bikero. Erdogan do vajo ke ya ê waştişanê Erdoganî bîyarê ca yan zî dewleta tirke hêrişanê winayênan bikera. Erdogan b nê hawayî gêreno ke sozanê awankerdişê xetanê enerjî, ekonomî û rayîrî bigêro. La bingeyê nê meseleyanê pêroyînan de meseleya kurdan est a.

Ma tîya de venga hukmatê Iraqî danê ke şaşîyanê hukmatanê verênan û Saddamî ra dersan bigêro. Tirkîya wazena Iraqî tewrê şerê xo bikera. Rewşa Iraqî cîya ya. Iraq de federasyonê kurdan o xoser est o. Îqtîdarê Tirkîya weçînayîşan de bin kewt û verê xo da hêrişanê neweyan. Ganî Iraq verê hêrişanê dewleta tirke bigêro.''

Remzî Kartalî îfade kerd ke îqtîdarê AKP-MHPyî seba ke hêrişanê xo yê neweyan ra destek bivîno gêreno û vat: ''Erdogan 22yê nîsane de zîyaretê Bexdadî keno. Erdogan qetî do tedaya hukmatê Bexdadî bikero. La xîretê Erdoganî pûç ê. Gerîlayî do ancî ser bikewê. Seba ke hêzê dewleta tirke bi gerîlayan nêeşkeno xo rê gêreno mutefîqan.

Ganî şarê ma, têgêrayîşê sîyasîyî, roşnvîr, nuştox, cinî û ciwanê kurdî vera nê hêrişanê îşxalî tewirê xo bimojnê. Tewirê şarê ma do hêrişan bişikno. Dewleta tirke heta nika nêeşkaye netîceyêke bigêra û naye ra pey zî do nêeşka. Şarê ma sîyasetê hêrişî do bin bivisno.''