Hamburg: Cansu Ozdemîr namzeta ma ya hempar a

Sîyasetmedara kurde Cansu Ozdemîr a ke di dewir ê ke eyaletê Hamburgî yê Almanya de parlamenterîye kena weçînayîşanê 23ê sibate de newe ra bîye namzet. Dezgehanê Kurdîstanî vizêr pare kerd ke ê paştî danê Ozdemîre.

Sîyasetmedara kurde Cansu Ozdemîr a ke 2 dewir ê ke eyaletê Hamburgî yê Almanya de parlamenterîye kena weçînayîşanê 23ê sibate de newe ra bîye namzet. Ozdemîre sey namzeta kurdîstanijan û demokratan eyalet de tewra weçîyanîşan bena.

Karê weçînayîşî yê Ozdemîre Merkezê Komelê Demokratîkî yê Kurdan ê Hamburgî de bi kombîyayîşêkê çapemenîye dest pêkerd. Zaf hêzanê demokratîkan pare kerd ke ê paştî danê Ozdemîre.

Ozdemîra 30 serre weçînayîşan de rêzê destpêkî yê Partîya Çepe de ya.

Ozdemîre kombîyayîşê çapemenîye de qisey kerd û kesanê ke paştî danê aye rê sipas kerd.

Ozdemîre vat: "Eke ez do bêra weçînayene ez do têkoşînê xo dewam bikera. Rewşêka winasêne de ke vera şarê mi polîtîkayê gemarinî yenê xebitnayene ez nêeşkena bêveng bimana. Ajananê MÎTî heta keyeyê mi ez teqîb kerda û mi rê gef wend. La mi heqdarîya dewaya xo ra tim bawer kerd û bi nê hawayî têgêraye.

Temsîlkaranê dezgehan zî kombîyayîş de qisey kerd û eşkera kerd ke Ozdemîre namzeta înan a hempar a.

Hemserekê KON-MEDî Tahîr Koçerî vat: "Ma venga şarê xo danê ke paştî bido Cansu Ozdemîr. Ganî ma her ca de komîsyonêk awan bikerê û seba weçînayîşê ci bixebitê."

Temsîlkarê AGÎGî vat: "Ma paştî danê Cansu Ozdemîr. Ma pê bawer ê ke nê weçînayîşî ra dima zî Ozdemîre do biba vengê kurdan."

Temsîlkarê Partîya Komunîste ya Kurdîstanî (KKP) Serhat Çetînkaya vat: "Seba ke mesela kurdan hîna zêde rojdem de biba hewcedarîya sîyasetmedaranê sey Ozdemîre esta. Ganî her kes paştî bidê aye."

Hunermenda sînema Hêja Tirk vat: "Ozdemîre her tim bîye dosta hunermendan. Eke bêra weçînayene ma ci ra wazenê ke seba averşîyayîşê ziwanê kurdkî bixebita."

Senarîst û îdarekar Onder Çakarî zî vat: "Nameyê hunermend û roşnvîranê ke binê sîwana AVAKINO de kom bîyî ser o ma do seba serkewtişê aye bixebitê."

Melayê Camîyê Şêx Seîdî Mela Fermanî zî vat: "Eke rayberê ma yê başî bibê û karanê başan bikerê ma pê kêfweş benê. Ganî her misilman seba serkewtişê sîyasetmedare Cansu Ozdemîr xîret bikero."