Bi wesîleya 21ê Êlule Roja Haştîye ya Dinya bajarê Cenevre yê Swîsre de kurd û dostê înan verê banê Neteweyanê Yewbîyayeyan de ameyî têhet û bale ante ser ke dewleta tirke Kurdîstan de gazanê kîmyewîyan şuxulnena.

Şaro ke warê Chanpoulette ame têhet bi sloganan şuxulnayîşê çekanê kîmyewîyan protesto kerd. Verê rayraşîyayîşî eşkerayîye ameye dayene. Eşkerayîye de partîya Ensemble à Gauche ra Wekîl Jean Burgermasterî meseleya kurdan sey meseleyêka mîyanneteweyîye hesibna û hêrişê bi çekanê kîmyewîyan Tirkîya şermezar kerdî. Burgermasterî waşt wa PKK lîsteya terorî ra bêro vetene û vat Swîsre ganî çekan meroşo Tirkîya û şiro aye ser ke wa meseleya kurdan bêro çareserkerdene.

Dima ra ver bi Neteweyanê Yewbîyayeyan rayraşîyayîşî dest pê kerd û tîya mîtîngêk ame kerdene. Qiseykerdişan bêvengîya welatanê Ewropa ya vera hêrişanê îşxalî û şuxulnayîşê çekanê kîmyewîyan ê Tirkîya û tecrîdê Îmraliyî ameye şermezarkerdene û ame vatene ke kurdî do tim wayîrê Rayber û ecanê xo vejîyê.