Rayberîya Almanya de semedo ke peynîya şerê zereyî yê Lîbya bêro qedînayene bi tewrbîyayîşê DYA, Rûsya, Çîn, Tirkîya, Îngilîztan, Fransa û Misirî ewro Berlin de konferansêko mîyanneteweyî do bêro kerdene.

Serekwezîra Almanya Merkele venga Serekkomarê Tirkîya Recep Tayyîp Erdoganî da ke tewrê konferansî bibo. Dawetkerdişê Erdoganî bî semedê nêrazîbîyayîşan. Seba ke Erdogan do bêro Meclîsê Federalî ewro nawnayîşê protestoyî yê girseyîyî do bêrê kerdene.

Rayberîya #RiseUp4Rojava (Seba Rojawanî Sere Wedarê) de ewro saete 10:00 de çalakîyî do dest pêbikerê. Cepheyê Antî Faşîstî zî seba nawnayîşan veng da. Cepheyo Antî Faşîst o ke zaf komanê çepgiran ra yeno meydan waşt ke Erdogan Berlin de bi çalakîyan bêro raştkerdene.

Cepheyê Antî Faşîstî eşkerayîya xo de vat ke nêno qebulkerdene ke dîkdatorêk sey Erdogan Almanya de bêro dawetkerdene û vat: ''Erdogan rêçê Hîtlerî ser o yo."

Cepheyê Antî Faşîstî eşkera kerd ke Erdogan etdaya muxalefetî û çapemenîye keno, heqanê merdiman binpay keno û bale ante sucanê şerî yê dewleta tirke yê Rojawanî ser û vat: "Wexto ke merdimî nê pêro çîyan bîyarê verê çimanê xo Erdogan heq keno ke bêro protestokerdene."