Partîya Demokratîke ya Şaran (HDP) çarçeweya xebatanê vîjnayîşî de bajarê Krefeldî yê Almanya de  xeylêk temsîlkaranê partî, konfederasyon, federasyon û rêxistinan reyde Merkezê Kulturî yê Elewîyan de ame têhet.

Temsîlkarîya HDPyî ya Ewropa, AABK, KCDK-E, TJK-E, AvEG-KON, ATİK, SYKP, ESU, Înîsîyatîfê Pontusî yê Ewropa, ADHK, Xeta Sor, Koordînasyonê Êzidîyan ê Ewropa, Partîya Çepa hewze, Akademîsyenê Ewropa, Meclîsê Surgunan ê Ewropa, PİK, CÎK, FEDA, Sîyasetkarê Surgunkerdeyî, TİP,  Parîya Şorişêgre, SKB, NOR-Zartok, PKAN, MAR-DEF,  Înîsîyatîfê Şarî yê Kurecikijan ê Ewropa, Kongreya Înşa ya Dêrsimî, SODAP,Cemaatê Kurdan ê Buldenburg-Berlin û temsîlkarê KKPyî tewrê kombîyayîşî bîyî.

Wekîlê HDPyî yê Êlihî Mehmet Ruştu Tiryakîyê ke qiseykerdişê akerdişî kerd bale ante muhîmya reyanê vîjnayoxanê Ewropa yê 2023yî ser. Tiryakîyî vat: ‘’Wextê rijyaşîşê AKPyî bîyo nizdî. Coka no vîjnayîş zaf muhîm o.  Goreyê referansanê kutukê teberê welatî eke xebata  xurte bêro kerdene HDP eşkeno teberê welatî ra 500 hezarî ra zafêr reyan bîgêro.''

Hemserekanê KCDK-E Fatoş Goksugur û Yuksel Koçî zî vat ê do vîjnayîşanê verênan ra ders bîgêrê, têkoşînî her hetî ra vila bikerê û pîya bi heme şaran û îtîqatan bixebitê û ser bikewê.

Reyna bi nameye dezgeh û partîyanê bînan de qiseykerdişî ameyî kerdene û bale ameye antene muhîmîya têkoşînê hemparî ser. Qiseykerdoxan vat ê do serkewtişî esas bigêrê û çîyo ke deste înan ra yeno bikerê.

Kombîyayîş de Koordîsnayonê Xebatanê Vîjnayîşî yê Ewropa ame ronayene. No koordinasyon do heme temsîlkarê partî û dezgehan êyê ke nêeşkayî tewrê nê kombîyayîşî bîbî ê zî tede, reyde xebete bikerê. Koordinasyon  do dewrê nizdî bêro tehêt û xarîtaya rayîrî eşkera bikero.