Hetkarê verênî Wezîrê Karanê Teberî yê Îtalya û huqûqnas Franco Danieliyî paştî daye Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye.' Danielî derheqê tecrîdê Îmraliyî de ANFyî rê qisey kerd.

Danieliyî ard ziwan ke tecrîdê vera Rayberê Şarê Kurdî Abdullah Ocalanî binpaykerdişê heqanê merdiman o û vat: ''Tirkîya ganî krîteranê demokratîkan ê mîyanneteweyîyan ê Konseya Ewropa û Neteweyanê Yewbîyayeyan bîyara ca. Seke tecrîdê Îmraliyî de dîyeno dewleta tirke peymananê ke îmza kerdê, nêana ca. Şert û mercê Îmraliyî bitehluke yê. Goreyê mi wextê ci ameyo ke Abdullah Ocalan zîndanî ra vejîyo û azad bibo. Nêbeno ke hînî Abdullah Ocalan zîndan de bimano.''

Danieliyî bale ante mesuldarîya Ewropa ya seba tecrîdî ser û vat: ''Mabênê heqanê merdima û menfatanê neteweyîyan de tim şerêk est o. Na rewşe tim bîya bingeyê têkilîyanê mabênê dewletan. Nê têkilîyê menfaetan benê sebebê binpaykerdişê heqanê merdiman. Yewîya Ewrop seba ke verê koçberan bigêra hetkarî dana Erdoganî û binpaykerdişê heqan nêvînena. Bêvengîya vera tepişîyayîşê Ocalanî zî na tekilîya Ewropa û Tirkîya ra ya.''

Danieliyî dîyar kerd ke o paştî dano hemle û vat: ''Ganî hemleya azadîye bêra pîlkerdene. Seba azadîya Adbullah Ocalanî bi serran o xeylêk entelektuelê sey Noam Chomskyî xîret kenê. Ma paştî danê na hemle. Hînî wextê ci ameyo ke Abdullah Ocalan azad bibo. Ganî çar hetê dinya seba azadîya Ocalanî vengê xo berz bikerê.''