Cigêrayoxa şer û haştîye, antîmîlîtarîste Dr. Mechthilde Exoya ke akademîsyena Zanîngehê Emdenî ya û endama Înîsîyatîfê Defend Kurdîstanî ya, derheqê hêrişanê Tirkîya, pozîsyonê PDKyî, xebatanê Înîsîyatîfê Haştîye yê Defend Kurdîstanî û astengkerdişê dewleta Almanya de ANFyî rê qisey kerd.

Mechthilde Exo vist vîrî ke par hezîrana 2021î de a mîyanê heyetê Înîsîyatîfê Haştîye de şîbî Başûr ke hêrişanê kîmyewîyan ser o cibigêra. Mechthilde Exo vat: ''Keyeyê Barzanîyan hetê dewleta tirke de cagêna. Ma Hewlêr de pêvînayîşê partîyan de dî ke ê zî nê hêrişan nêwazenê. Ma mexdûranê şerî, partîyan, rêxistinanê komelê sivîlî, akademîsyen, hunermend, nuştox, rêxistinanê cinîyan û ekolojî reyde roniştî. Ê pê pêvînayîşanê ma kêfweş bîyî la PDKyî tewirêko cîya mojna. PDKyî nêmeyê heyetê ma asteng kerd.''

Mechthilde Exo bale ante tewirê polîsan û hukmatê Almanya yê vera kurdan ser û vat: ''Almanya dezgehanê kurdan ser o teda kena û destûr nêdana ke komelê surgunî xo rêxistin bikerê. Dewleta Almanya nêwazeba mesele serê zemînêkê polîtîkî de bêra nîqaşkerdene û şerê vera kurdan de bena parçeyêk.''

Mechthilde Exo derheqê gefanê îşxalî yê Erdoganî yê vera Rojawanî de zî wina vat: ''Tirkîya Rojawan de merdimanê sivîlan qir kena û nika zî wazena bi metodanê emperyalan herême îşxal bikera. Ganî welatê Ewropa û hêzê mîyanneteweyî paştî bidê têkoşînê demokratîkî û modelê Rojawanî.  Ganî Erdogan hînî bêro vindarneyene. Sîstemo ke kurdan Rojawan de awan kerdo, ma pêroyînan rê alternatîf o û ganî pêro welatan de bêro awankerdene.''