Mesuldarê Qirkerdişê Sêwazî (Madimakî) Ahmet Turan Kiliçî bi fermanê Erdoganî amebi veradayene. Bira Erdoganî şaristanê Zurihî  yê Swîsre  û paytextê Îngîlîstanî Londra de bi çalakîyan ameye protestokerdene.

Zurih

Zurîh de bi  vengdayîşê Federasyonê Yewîya Elewîyan ê Swîsre (ÎABF) hetê rêxistinanê elewî û dezgehanê demokratîkan ra îstasyonê trenî yê merkezî de çalakîyêke ameye kerdene. Çalakîye de fotografê sîyasetmedarî û hunermendî yê ke Madimak de wefat kerdbi ameyî berzkerdene û pankarta bi nuşteyê ''Ma sey merdiman înan efû nêkenê, ê înan efû bikerê zî'' ameye akerdene. Dima nameyê ÎABFyî ser o eşkerayîyêka bi almankî ameye wendene û hetê hunermendan ra deyîşî ameyî vatene. Çalakîye bi rêzgirewtişî qedîyaye.

Londra

Temsîlkar û endamê  Federasyonê Elewîyan ê Brîtanya (BAF) verê Sersefîrîya Tirke ya Londra de ameyî têhet û  efûkerdişê Ahmet Turan Kiliçî protesto kerd. Çalakîye de dowîzê bi nuşteyê ''Ma sey merdiman înan efû nêkenê, ê înan efû bikerê zî'' û ''Heta ke ma vajê qedîya nêqedîyeno'' û fotografê kesanê ke Qirkerdişê Sêwazî de wefat kerd ameyî kiriştene. Çalakîye de bi hawayêkê bêmabênî ''Kiştox Erdogan'', ''Roje do bêra, Erdoganî ra hesab do bêro waştene'' û ''Vera faşîzmî mil bi mil'' ameyî vatene.Verî ke eşkerayîye bêra kerdene çalakîkeran waşt ke çelengo sîya verê sersefîrîye de ronê la polîsan destûr nêda.