Dima ke Serekkomarê Tirkan Recep Tayyîp Erdoganî pare kerd ke o do DAÎŞijanê rojawanijan bierşawo welatê înan, Ewropa û bi taybetî Almanya kewtî rewşa alarmî. Selahîyetdarê Ewropa vanê ke eke çîyêko winasên bibo DAÎŞijî wextêkî ra dima do bêrê raverdene û no seba asayîşî rîskêko pîl o.

Dewleta Tirkan roja dişemeyî cergêkê DAÎŞî erşawit Danîmarka, yew zî erşawit Almanya. Yeno pawitene ke no proses mîyanê çend rojan de do bibo pîl. Ame parekerdene ke roja pancşemeyî domanî zî tede 7 DAÎŞijî û roja îneyî zî 2 DAÎŞijî do bêrê erşawitene. Yeno pawitene ke 11 DAÎŞijî Fransa rê û 2 DAÎŞijî zî Îrlanda rê bêrê erşawitene.

Almanya: Seba rîskê asayîşî ma rewşa alarmî de yê

Wezîra Edaletî ya Almanya Chrîstine Lambrecht pare kerd ke seba ke asayîş nêkewo rewşêka bitehlûke polîs û dadgerî kewtî rewşa alarmî. Lambrechte vat: "Heta ke birra tepiştişî bêra girewtene nê kesî nêzdî ra bêrê taqîbkerdene û neçare bimanê ke kelemçeya elektronîke vera înan bêra xebitnayene. Tirkîya reyde bi karê hemparî ma xîret kenê ke kesê ke bêrê teslîmkerdene tesbît bikê. Kesê ke heta nika yenê waştene ke bêrê erşawitene têkilîya înan bi DAÎŞî çin a.‘‘

Hucreyê DAÎŞî yê Almanya nê wextî de têgêrayî. Şaristanê Offenbachî yê Eyaletê Hessenî de vera hucreyêkê DAİŞî yo ke amadekarîya hêrişê bi bomba kerdêne, operasyonêk ame kerdene û netîce de 3 kesî ameyî destbendkerdene ke înan ra yew tirk û yew zî makedon bîyî.